This is where you stick random tidbits of information about yourself.
Ég er Kriss og ég er Rokk.
29 apríl 2003 Fitulaust og freistandi fyrir rottur á öllum aldri! Ekki hafði ég tíma til að blogga í gær, því á heimili mínu ríkti hættuástand um tíma og fjölskyldan var í uppnámi. Þegar þessi frásögn hefst er ég á leiðinni með bókahommanum og fleirum á aðalfund FSB. Ég er staddur í lyftu á leiðinni uppí salarkynni í Austurstræti 18, þegar síminn hringir. Bryndís konan mín er í símanum og segist hafa séð rottu eða mjög feita mús skoppa meðfram veggjum í svefnherberginu. Bryndís var í öngum sínum. Fundurinn þaut innum annað eyrað og útum hitt þar sem ég gat ekki hugsað um annað en fjölskylduna sem beið mín í Barmahlíðinni í helgreipum feitrar rottu.
Borgar Jónsteinsson trompetleikari, bauð fram aðstoð sína og við héldum heim til mín strax eftir fundinn, með viðkomu í Húsasmiðjunni þar sem við keyptum tvær músagildrur. Þegar inní herbergi var komið, sáum við ekki til dýrsins og settum gildrurnar tvær undir rúm og inn við vegg. Ég hafði sett smjörklípu á þær báðar, en það sem var til í ísskápnum var Létta - viðbit, fitulaust og freistandi, sem mér fannst heppilegt, ef þetta væri svo bara feit mús. Á leiðinni út úr herberginu fann Borgar svo rottuskít.
Þar sem við höfðum fengið þann úrskurð að þetta væri rotta var tímabært að búa til nýja vinnuherferð. Og það varð úr að Borgar fór á æfingu hjá Lúðrasveit Verkalýðsins og ég hringdi í vin minn, hetjuna; Steina Sleggju!
Þegar Steini svaraði í símann var hann að grilla oní sig lamb, hann brást æði fljótt við þessum fregnum, blés á grillið, greip hina þunguðu heitmey sína í fang sér, útí bíl og rauk af stað niðrí bæ. Á leiðinni nagaði hann hálfhrátt lærið á lambinu, undir stýri.
Á meðan Steini og Sunna voru á leið til okkar frá Sleggjustöðum, höfðum við farið í frekari vopnaleit niðrí Húsasmiðju. Við hittumst svo í hlaðinu en Steini var klæddur í þartilgerða rottufangarahanska er hann kom útúr bílnum. Eftir að við höfðum samstillt úrin og Sunna náð að hlúa að konunni og barninu, réðumst við Sleggjan til atlögu. Ég með sokkana bretta utanum gallabuxurnar, límdúk í annarri hendi og strákúst í hinni og Steini var í hönskunum með sígarettu í munnvikinu, Prince..ekki lights. Eftir að við höfðum sparkað upp svefnherbergishurðinni sáum við að rottan hafði greinilega gleypt við viðbitinu. Hún var föst í gildrunni. Dauð. Þetta virtist vera fremur ung brúnrotta sem hafði villst inn um gluggann og hafði tekist að kúka allt herbergið út. Bíddu bara rotta þar til ég kemst heim til þín..!
Upphófust miklar sótthreinsanir, sem Bryndís stjórnaði af alúð og loks undir miðnætti var óhætt fyrir Stefán Bjart að sofna í rúminu sínu. Enn er ekki vitað hvort rottan hafi borið með sér einhverjar viðbjóðspestir, s.s. einsog svartadauða, en hinsvegar hef ég verið með þrálátt nefrennsli í allan dag.
Frægikarlgærdagsins: Steini Sleggja en hann er sönn hetja, sem svarar kalli vina sinna í nauð, en ekki hafði liðið sólarhringur frá því hann vann mikið afrek útá sjó við Súgandafjörð, þar sem hann hífði sjóveika björgunarsveit af fleka sínum uppá lunningu og um borð í bát sinn.
7:05 e.h. Ekki vera feiminn
27 apríl 2003 Reykjavík National Park Ég hafði ekki tíma í að vera þunnur í dag eftir kiddýogtóta-partýið í gær. Elísa systir gisti hjá okkur í nótt og fór í morgun með Flugleiðum til Kaupmannahafnar, þaðan sem hún tekur lest til Lundar í Svíaþjóð. En annars var partýið fínt, snakk, bjór og vafasöm nælumerki í boði. Einnig var boðið uppá óvæntan leynigest; hinn bítilhærði Bjarni Valdimars var þarna kominn inn á gólf sjóðheitur frá Austurríki. Mörgum var brugðið en öllum þó skemmt við þessa sjón, það er helst að húsfreyjunni Kiddý hafi brugðið en henni var keyrt rakleiðis á slysó þar sem gætt var að bólgum í vinstra auga.
Ég og S.Bjartur fórum í hressandi göngutúr niðrí bæ, stoppuðum á Súfistanum þar sem ég fékk mér froðukaffi í útibolla, ekki voru til hefðbundnir bollar, heldur fékk ég í staðinn sjeikdollu. Mér fannst ég vera soldið sjoppulegur á labbinu, en samt er það nú frekar listahommalegt að sjá fólk labbandi með kaffibolla úti á götu. Það er þó betra að fá kaffið í sjeikdollu en meikdollu..hahaha.
Við héldum göngunni áfram og komum við niðrá tjörn. Þar var fólk í óða önn að kynna fyrir börnum sínum hvernig fuglar haga sér í ætisleit sinni á tjörninni. Þar voru brauðfylltir svanir, hettumávar bryðjandi poppkorn og á gangstéttinni við tjarnarbakkann voru nokkrar sísvangar endur, töltandi í skítnum úr sjálfum sér, að kroppa í tyggigúmmí.
Við röltum svo heim á leið í gegnum rústir miðbæjarins og hittum þar fyrir þá félaga bókahommann og jómba vin hans en þeir voru á leiðinni á gayljósmyndastofu til Oddvars, þar sem hann klippir og límir saman lokaverkefni sitt í skólanum. Fjalar og Jómbi fengu lítið kurteisisbros í gegnum snuddufarið hjá Stefáni.
Frægikarldagsins: Heiðar í Botnleðju, en hann hann var einmitt á rölti í Reykjavík National Park, þ.e.a.s. við tjörnina með fremur stólpaðan krakka. Við kinkuðum kolli hvor til annars og okkur datt örugglega báðum í hug að við héldum hvorn annan vera helgarpabba, en Bryndís var náttúrulega heima að sauma utan um kosningarmaskínu vinstrihreyfingarinnar græns framboðs.
11:01 e.h. Ekki vera feiminn
26 apríl 2003 Heima er best! Laugardagur í dag, frábært. Það þýðir bara eitt; sófinn, Gísli Marteinn og Spaugstofan. Nei, djók!
Ég fór í vinnu í dag, stjórnmálamenn komu í heimsókn og lásu úr uppáhaldsbókum sínum, persónulega fannst mér fulltrúar Frjálslyndra og Sjálfstæðisflokks standa sig best. Magga Stína og Strengir komu svo og trylltu lýðinn. Já, ég þakka lesendum og vinum kærlega fyrir komuna!!
Ég, Bryndís og Stefán Bjartur búum í Barmahlíð, Reykjavík-suður, og erum umkringd frægu fólki. Fyrir ofan býr Heima er best-kokkurinn Rúnar, sem er mikill öðlingur. Hann ætlaði sér að slá garðinn okkar í dag og átti í erfiðleikum með að koma sláttuvélinni í gang. Ég reddaði þessu, ég sá að meinið var að vélin hafði fengið of mikið bensín inn á sig, svo ég slökkti á innsoginu og hún þaut á stað. Við Rúnar, ákváðum að halda húsfund í þarnæstu viku og taka saman það sem við þurfum að gera; að bera pallaolíu á pallinn, klippa trén og búa til girðingu. Rétt neðar í götunni búa t.d. Einar Kárason, Ásgrímur Jónsson og fyrir ofan býr leikarinn Baldur Hreinsson. Ég sé fyrir mér í framtíðinni að Einar Kárason skrifi um mig sögu, Ásgrímur komi henni í kvikmyndahandrit og svo gæti Baldur leikið mig. Þetta gæti alveg gerst, hefur Einar ekki skrifað um róna, brjálæðinga og geðsjúklinga? Ég dríf mig bara út í kvöld og hleyp allsber um hverfið og öskra. Þá er þetta komið.
Gaman að heyra fréttirnar frá Gunnari og Bjarnveigu. Stefán Bjartur er agalega spenntur og glaður að eiga von á fleiri vinum í klíkuna, og spennandi að vita hvað við eigum í vændum frá Herra og Frú Sleggju. Ég sá að Denni var að minnast á þessa síðu, ég verð nú að fara að kíkja til hans. Stefán og Svava Rún verða að fara að kynnast.
Það er partý í kvöld hjá Kiddý og Tóta en þau eru vinir okkar og voru að flytja í sömu sókn og við. Það verður vafalaust stuð. Vonandi að Tóti gefi sér frí frá Hverfisskrifstofu Sjálfstæðra.
Frægikarldagsins: Þórður Árnason stuðmaður, hann býr við hliðina á mér. Mamma mín hélt að hann væri prestur. Þórður er óstjórnlega hress og þrífur bílinn sinn oftar en... tjaa, oftar en ég. Hann lánaði okkur Rúnari, sláttuorf til að slá meðfram beðum og veggjum.
8:36 e.h. Ekki vera feiminn
25 apríl 2003 "sumarið er tíminn, þegar kvenfólk springur út" Þetta er fallegur tími, vor í lofti og fólk með almenn hressilegheit. Ég held ég sé reyndar meira fyrir haustið, það hefur eitthvað með birtuna að gera. Kannski er ég bara haust. Hvað er svo framundan í sumar; barnið Stefán að verða ársgamalt, platan Flatus mun fæðast, hin árlega útilega vinaklíkunnar, nýt sumarfrísins með konu og barni á vogskorinni strönd vestfjarða, barnsfæðingar hjá vinaklíkunni og vonandi dvínandi óvissa í atvinnumálum fjölskyldunnar..
Í gær kíktum við í Nauthólsvík á félaga okkar, Grím og Helgu Völu, keppa í blaki við Ömma og Steingrím J. og fleiri, það var nú stutt kurteisisheimsókn og mér tókst ekki með neinu móti að losna við mórallinn eftir að hafa ekki komist á tónleika Gríms og co í Ekkert Kjaftæði á miðvikudagskvöldinu. Grímur, ég varð bara að hjálpa konunni minni að sauma jakkaföt!!
Frægikarlgærdagsins: Kolbeinn Óttarsson Proppé (sonur Óttars í HAM..djók) sem er gamall pönktrommari og lítur út eins og Dóri Gylfa.
Annar í sumri í dag, ég hjólaði í vinnuna, fór á bókaþing í Iðnó. Hvert stefnir bóksala á Íslandi? Er búið að drepa bóksalann, líkt og kaupmanninn á horninu? Já, nú stefnir allt í að það verði bara til ein bókabúð á landinu, í viðbót við Bónus og Hagkaup. Bestsellerisminn búinn að drepa ljóðið og skáldsöguna, einhæfni algjör, afgreiðslufólk kann á afgreiðslukassann en veit ekki hver Guðbergur Bergsson er. Kannski fæ ég vinnu á kassa, fæ derhúfu, spangir og pólóbol og segi "geté´asstoða"?
Voðalegt kvabb er þetta í manni. Ég hvet alla velunnara að mæta á morgun Í Mál og menningu, Laugavegi 18, kl. 14.30 og sjá hljómsveitina Strengi og Möggu Stínu með eldhressandi sumardagskrá, allt frá Ellu Fitzgerald til Ellý Vilhjálms, það væri gaman að sjá ykkur.. (þetta er ekki kosningaráróður)!
Frægikalldagsins: Eiríkur Sverrir Björnsson, gamall félagi minn sem ég sá á rauðu ljósi á Lækjargötu í dag. Ég hef ekki séð Eirík síðustu 5-6 árin, en við eigum það sameiginlegt að hafa verið barnastjörnur. Við komum fram í hæfileikakeppni í þættinum Happó á Stöð 2, árið 1991 og sungum saman "ma-nah, ma-nah dududududu" vögguvísu úr Prúðuleikurunum. Við vorum í öðru sæti, töpuðum fyrir gömlu munnhörpufífli frá Húsavík sem mæmaði örugglega og komst á tónleika með Michael Jacksson og fékk nokkra kassa af Pepsíi...mig langaði hvort sem er ekkert í Pepsí, fáviti.
11:06 e.h. Ekki vera feiminn
23 apríl 2003 Síðustu vetrarhörkur. Eftir nokkurt hlé var upptökum haldið áfram á Flatusi í dag. Gunnar og Gummi kíktu á Bibba í Stúdíó Rusl og þegar hefur Gunnar lokið við einhvern rytmagítar í nokkrum lögum. Þetta kemur allt saman. Þið sýnið stillingu.
Bryndís mín og Stefán Bjartur komu með Flugfélagi Íslands í morgun frá Ísafirði, flugið tók 40 mínútur og flogið var í rúmlega 17000 fetum. Flugþjónn í þessarri ferð var Draupnir...hann var ekki í sokkabuxum. Ég er rosalega feginn að þau séu komin, þetta voru geysierfiðir dagar og mikið reiðuleysi.
Stórkostlega furðuleg kona kom í Bókabúð Máls og menningar í dag, hún spurði hvort bækur væru ekki nær ókeypis í dag því það væri nú dagur bókarinnar. Hún galaði yfir öðrum viðskiptavinum svo mikil hræðsla greip um sig, sagði að sér væri svo heitt og væri þreytt í upphandleggjunum. Að lokum keypti hún bók fyrir bróður sinn (ég segi ekki hvaða bók hún keypti, né hvort hún fékk heimild á kortið sitt, fólk verður að geta treyst okkur í BMM), bað svo um soðið vatn með pillunum sínum, sem hún að sjálfsögðu fékk og fékk á endanum mikinn kíghósta en hún var greinilega sárþjáð af astma. Við sendum hana í burtu með Bæjarleiðum.
Við borðuðum svo spikfeitt sorpfæði í kvöldmatnum ásamt Herra og Frú Sleggju og Jóni og Gvendi, bændum frá Lambastað á Nesi. Jón sem er einn fræknasti smali hér á landi á, var í fantastuði og reitti af sér brandarana, sem við hlógum kurteisislega að.
Frægikalldagsins: Helgi Þorgils Friðjónsson sem var fimmtugur um daginn...vísvitandi!
10:17 e.h. Ekki vera feiminn
22 apríl 2003 Ég er ekki Yaris né C3. Ég er ekki DV. Ég er ekki zombie. Ég er kriss. Jæja, konan og barnið koma heim á morgun. Ætla sé ekki best að sleppa því að bulla hér og fara að þrífa heimilið, skúra upp ælu og blóðbletti, já og náttúrlega að vaska upp. Viss tímamót áttu sér stað í höfuðbóli vestfjarða þegar barnið, Stefán sonur minn, gat sýnt hverjum og einum sem urðu á vegi hans, hversu stór hann er. Þetta gerðist þegar hann komst úr Reykjavíkurmenguninni og gat hugsað skýrt.
Elísasystir á afmæli í dag, og er nú að halda kaffiboð fyrir westan. Bakaði víst m.a. skúffuflatköku. Til hamingju með afmælið.
Fór í bíó eftir vinnu, sá Gamle mænd i nye bilen sem er víst undanfari I Kina spise de hund og hún er bara þrælfín, ég hló allavega heilmikið. Annars fer ég svo sjaldan í bíó að ég geri engar kröfur, finnst voða gaman, hefði líklega migið í mig á Johnny English...
Ég hitti Vestfjarðagoða á Lóuhreiðri í hádeginu en hann opnaði þar sýningu í dag. Mæli með henni. Eyvindur er mikið ljúfmenni og afburðarskáld ( það er ekki hægt að nota orðið snillingur, þó ég hefði kannski notað það hér, en það eru nú allir snillingar í dag). Árið 1997 spilaði ég undir á kongatrumbu, er hann rappaði af mikilli lyst, "..hakk,hakk,hakk
hakka allt í krakk"
Gestir Mjúkinskinnu koma víða að, og er það skemmtilegt. Maggabest er hress og talar mikið um kynhvarfa..? Haukur segir mig vera fyrir ofan 0-kvarða í fínheitum. Hann er nú alls enginn viðbjóður sjálfur.
21 apríl 2003 Ekkert kjaftæði Við Gunnar brunuðum af stað suður til Sandgerðis og ætluðum að heilsa uppá áhöfnina á Undra frá Súðavík, en þar var enginn svo við heimsóttum einn skipverjana nefnilega Steina Sleggju. Þegar við komum á Sleggjustaði var svei mér uppá honum Steina typpið og vildi hann ólmur í fótbolta. Og það varð úr við lékum knattspyrnu á Ægissíðuleikvangi fram eftir degi þar til að skyggja fór en þá snerum við heim á Sleggjustaði þar sem húsfreyjan var búin að hafa til fyrir okkur suður-amerískar pönnukökur með nauta- og fuglakjöti. Ég segi bara takk fyrir mig..
Frægikalldagsins!: Grímur Atlason, bassaleikari Dr.Gunna og hljómsveitarinnar Haltu kjafti og svo er hann penninn hvassi á morgunpóstinum sem varar okkur við annarri Viðeyjarstjórn.
Hljómsveitin Haltu kjafti, verður með tónleika og ekkert kjaftæði á kosningarskrifstofu VG í Ingólfsstræti að kvöldi síðasta vetrardags. Mætum öll.
10:55 e.h. Ekki vera feiminn
"Það var einu sinni kerling og hún hét Soffía.." Það var víst ekki Pálína sem varði besta bæinn sinn fyrir fólinu mér.
Ég var fullur í gær, fór í partý til Palla í maus, núna þarf ég einmitt að rölta og ná í bílinn. Þetta var bara þrælfínt, sátum og drukkum öl og vín og hlustuðum á Michael Jackson og Justin Timberlake. Á meðan þetta gerðist í Þingholtunum, var á Ísafirði Elísasystir að spilla Bryndísi minni og dró út á galeiðuna. Mér leist lítið á það því Elísa hefur þann einkennilega sið á dansgólfinu, að vilja sparka í súlur og aðrar innréttingar svo stórsjái á þeim.
Ég kynni hér hressilega og flippaða nýjung á síðunni en það er Frægikalldagsins!, en ég er svo heppinn að vera umvafinn frægu fólki bæði í vinnu og úti á lífinu.
Sá sem ríður hér á vaðið er frægikallgærdagsins; Palli í Maus 1:52 e.h. Ekki vera feiminn
20 apríl 2003 Páski. Hvað ætlar þú að gera á páskanum? Þetta er búið að vera ágætis dagur. Ég hjólaði úr Öskjuhlíð, niður í Nauthólsvík, meðfram ströndinni og útá Seltjarnarnes og þaðan um gamla hverfið okkar, gamla vesturbæinn og þaðan uppá Bergþórugötu. Þótt að Bryndís mín sé fyrir vestan á ég aðra Bryndísi, fyrir systir, en hún bregður sér oft í líki mömmu og sér um að litli strákurinn ég borði vel og hagi mér. Ég sá Eirík Jónsson, í mílufjarlægð, hjóla á móti mér áðan. Mig langaði soldið að ulla á hann en ég gerði það ekki. Skrýtin tilfinning að vilja ulla á fólk. Einkennilegur siður að ulla.
Mér líður ágætlega í gaslausu íbúðinni minni, er að hlusta á þægilegt kántrý sem ég átti uppí hillu og Jonni benti mér á þegar hann kom til mín í kaffi um daginn.
Steini og Sunna komu í heimsókn til mín í gær og við ræddum um heimsmálin, virkjanir, líf og dauða. Veltum því fyrir okkur hvernig það sé þegar lífið er á enda og við förum máski til himna; ef maður er rosa góður allt sitt líf, borðar réttan mat, snertir ekki eiturlyf, hreyfir sig, drepur engan og fer alltaf í kirkju, fær maður þá vellystingar þegar maður kemur til himna, löðrandi feita kjúklingabita, kókaín og hægindastól? Svo ef maður er vondur; borðar óhollan skyndibita, stundar enga líkamsrækt, drepur einhvern og hlustar á þungarokk, þá kannski mætir maður í himnaríki og þarf að eyða öllum tíma sínum á hlaupahjóli, bryðjandi þurrt hrökkbrauð..? Maður veit ekki.
Það er magnað hversu óhugnanlega oft hann Enter hittir naglann á höfuðið; http://www.baggalutur.is/skrif.php?TEG=3&ID=274. Hvað segir hún Pálína Vax við þessu. Hafa gestir heyrt í þeim hressu Vax-systkinum frá Bolungarvík? Bolvíkingar fóru geyst í markaðsherferð í fyrra og auglýstu bæinn sinn með sloganinu; Bolungarvík, endastöð sem kemur á óvart! Hver segir að maður þurfi að lenda annaðhvort í helvíti eða himnaríki... komdu til Bolungarvíkur.
6:25 e.h. Ekki vera feiminn
19 apríl 2003
Pína kriss!
Í gær upplifði ég mestu kvöl og pínu síðustu tvöþúsund ára. Þetta var rosalega leiðinlegur dagur og ég tók eftir því síðdegis hvað ég sjálfur var óþolandi leiðinlegur. Eftir að ég var búinn að reiðast við Stefán son minn, fyrir að borða ekki grautinn, og öskra eitthvað leiðinlegt á konu mína að ástæðulausu, fór ég út með sofandi son minn meðferðis. Ég labbaði eitthvert og var kominn á Laugaveg þegar ég tók eftir því í tómum búðarglugga hvað ég var hræðilega ljótur með skelfingar-fýlusvip. Eftir tveggja tíma göngu hafði ég róast töluvert, og hlakkaði til að borða hangikjötið sem Bryndís var að laga. Þegar ég kom heim tókum við eftir því að hangikjötið var búið að dúsa í pottinum undir engri suðu. Gasið var búið. Tók þá við örvænting og vonleysi um nokkra hríð en svo hrissti konan mín af sér slenið og setti kjötið í ofninn ásamt nokkrum kartöflum. Þetta borðuðum við svo með bestu lyst og skreyttum diskinn með gulum og grænum baunum. Um kvöldum áttum/átum við nammi.
Eftir andlegar hrakfarir gærdagsins ákváðu konan mín og sonur að yfirgefa mig og keyrðu á brott til Ísafjarðar.. með mömmu minni og pabba. Neinei, það er ekkert vesen, ég ákvað að leyfa þeim að fara vestur að því fjölskyldan er öll þar, Elísa systir og svona.. Ég bara einn heima og veit ekkert hvað ég á að gera, vonast til að heyra í Steina sleggju og frú. Það hlýtur að koma eitthvað gott úr því. Ég ætla alla vega ekki að vera leiðinlegur.
18 apríl 2003 Föstudagurinn lángi..djísus kræst,hvað þetta er langur dagur! Skrýtið hvað allt er langdregið í dag. Ég horfði á gamlan Frasierþátt og hann var í ca. klukkutíma. Mér finnst soldið sorglegt að RÚV geti ekki endursýnt gamla þætti, það er besta mál að endursýna þætti svona sem uppfyllingarefni, en þeir endursýna alltaf þáttinn frá deginum áður. Hvar er Staupasteinn, Tommi og Jenni og Prúðuleikararnir?
Elísa systir Bryndísar er komin í stutta heimsókn frá Svíþjóð, en hún kom öllum að óvörum og heldur gleðilega páska með tengda-fjölskyldu minni fyrir norðan, í botni Skutulsfjarðar. Ég hef bætt við í linkasafnið hér fyrir neðan elízu, pallafrænda sem er kærasti elízu og jóhönnu sem er þriðja systirin. Bryndís, þú verður að fara að búa til síðu!
Annars eru margir vina okkar sem dvelja á Ísafirði um páskana, fólk á náttúrulega miklu frekar að fara þangað heldur en til Akureyrar. Akureyri er bara Bolungarvík í Large. Það væri nú gaman ef fólk myndi taka að sér að skrifa pistil að vestan, jafnvel í Mjúkinskinnu.
17 apríl 2003 Skírdagur.Skýr dagur.Skýr afstaða.Skyr.is-dagur. Fór í kirkju í morgun, Jósef Fannar frændi minn var fermdur, það lukkaðist vel og ég tók þátt í tveggja klukkustunda athöfn, þar af klukkustundarbergingu. Ég stóð í ströngu við að taka mark af ræðu prestsins, Þórhalls Heimissonar, en hann leit út eins og úfinn Jón Gnarr. Mér fannst hann ekki tóna vel heldur. Annars var athöfnin fín, allur aðbúnaður góður, vel valdir sálmar en altarisgangan aðeins of löng..þannig að ég gef athöfninni tvo krossa. + + *kriss
Við fjölskyldan munum svo hitti vini okkar í kvöld og eiga með þeim vafalaust unaðslega kvöldmáltíð, vonandi ekki þá síðustu.
Sérkennileg auglýsing aftan á fréttablaðinu í dag, ég leit á hana og sá að hún hlaut að vera frá 10-11 búðunum, það var samskonar litur en ég sá ekki hvað var verið að auglýsa. En viti menn, þarna voru komin Kolbeinn Proppé og einhver Jóhanna frá Vinstri-Grænum að segja okkur að næst á dagskrá væri réttlæti..Réttlæti, á góðu verði þegar þér hentar!
2:19 e.h. Ekki vera feiminn
16 apríl 2003
Í gær hitti ég vin minn Smára Karlsson og spúsu hans Sigríði en þau hafa dvalið um langt skeið erlendis. Við fórum á Ölstofu Kormáks og Skjaldar þar sem öll *krútt bæjarins voru niðurkomin (krútt, skv. skilgreiningu í desemberblaði Mannlífs). Við spjölluðum um allt frá verktöku til dýralækninga, ríkidæmi til fátæktar, drukkum vatnsbragðandi froðusull og enduðum á þeirri skilgreiningu á títtnefndum krúttum; að fyrirmyndir þeirra allra væru þeir Magnús og Eyjólfur, sem flestir muna eftir úr einhverju áramótaskaupinu. Magnús og Eyjólfur; fyrstu krúttin..svo kom Sigrún Eðvalds og Björk ofurkrútt.
Fólk hefur verið að heimsækja Mjúkinskinnu og ástæða til að þakka fyrir komuna á fyrstu lífdögum hennar, hún styrkist með hverjum degi og endurbætist. Menn kvarta yfir því að hún sé torfundin og með mikla naflaskoðun eða ristilspeglun en það var nú ekki meiningin, ég kann bara svo illa á þetta, ég laga þetta.
Páskar framundan. Tveir dagar frí, einn dagur vinna, tveir dagar frí. Hvað gerir maður, ég veit ekki, ég kann ekki að vera í fríi og svo er það þannig að ég þjáist af sjúkdómi sem heitir frístundaveiki. Í hvert skipti sem ég er í fríi, t.d. á sunnudögum þá fæ ég kvef, hálsbólgu, gigt og fleira..!
Jæja, ég ætla að fara að fylgjast með frambjóðendum í sjónvarpinu, enn hef ég ekki getað gert upp hug minn, eitthvað verður að fara gerast annars þarf ég að henda "X-"-inu. Elín Sm., ég vona að ég sé með nógu skemmtilega skrifað blogg fyrir þig..!
Hvað er Borgarnes bara staðurinn í dag? Ef maður þarf að gefa út yfirlýsingu þá fer maður til Borgarness! Fór Hagkaupskallinn og undirmenn hans hjá Ogi til Borgarness í dag til að vígja þetta frábæra nafn; ..Og Vodafone?? Ég var búinn að giska á mörg nöfn s.s. eins og; Talsími, Símtal og Ístal.. Skemmtilegt með öll þessi fyrirtækjanöfn sem byrja á Ís...(Ístak, Íshestar, Ísblikk.og.fl.), maður veltir fyrir sér hvort til séu fordæmi í öðrum löndum t.d. á Grænlandi; Græntak, Grænhestar og Grænblikk..
Jæja, að lokum fyrir þá sem hafa nennt að lesa í gegnum þetta bull, þá er hér skemmtilegt orð sem þið getið velt fyrir fjölskyldunni um hátíðina; RAKSÁPUPÁSKAR. Þetta má lesa afturábak og áfram. Bragi vinur minn kenndi mér þetta en hann er íslenskufræðingur eins og sjá má.
9:15 e.h. Ekki vera feiminn
Nú er helgin á enda. Flatusinn lifir, hann fæddist um helgina. Nú á bara eftir að klæða hann almennilega. Foreldrar mínir komnir suður í kaupstað, náðu að klóra sig uppúr fannferginu og öllum snjóflóðunum vestur á fjörðum. Þau komu færandi hendi, gáfu okkur fullan poka af ilmandi vestfirskum harðfiski sem ég tók að sjálfsögðu með mér í stúdíóið í dag. Þegar platan kemur loks út getið þið rýnt í trommurnar og heyrt að það er líkt að ég sé að berja harðfisk í nokkrum lögum. Það verður sérstök lykt sem mætir stúdíóeigendum þegar þeir mæta til vinnu á morgun.
Annars hlakka ég til að fara í hádegismat á Lóuhreiðri á morgun, eftir nokkurt hlé. Ég mæli hiklaust með þeim stað, þar færðu almennilegan mat, þetta er ekki staður fyrir aumingja. Mér grunar að það sé steikt ýsa í raspi á morgun..
Ég man á æskuárum hvernig ég gat ekki fengið skilið að ýsusoðningin væri alltaf á mánudögum, fastur liður eins og venjulega, en eini vikudagurinn sem ekki fékkst nýtt rúgbrauð var einmitt mánudagur. Þetta hefur væntanlega ekki bara verið svona á mínu heimili..? Guðmundur Andri Thorsson sagði eitt sinn að soðin ýsa bragðaðist eins og blaut gólftuska... hver eldar á hans heimili!
11:09 e.h. Ekki vera feiminn
Mér brá heldur í brún þegar ég opnaði síðuna áðan, fólk hefur hrúgast inn í hrönnum svo stórsér á teljaranum. Ástæðuna sá ég á bloggi Gunnars en þar minnist hann eitthvað á þetta. Upptökur á "Flatus lifir" hófust af krafti í dag og erum við meira en hálfnaðir. Mjög góð stemning í hópnum og ekkert kjaftæði.. Við Grímur Atlason bassaleikari munum huxanlega klára trommur og bassa á morgun ef allt gengur að óskum. Annars er Grímur þessa dagana að brillera með vinstri-græna bandinu "Ekkert kjaftæði", hann, Þórey Edda og Ömmi og þau.
Ég er mjög ósáttur við X-D að stela eina slagorðinu sem öll þjóðin getur sameinast um; áfram Ísland! Djöfulsins ógeð! Ferlega óviðeigandi. Dettur mér í hug annað rugl í svipinn, í Sjallanum á Ísafirði eru oft samankomnir x-d fávitar og ísfólk, enda vertinn hvort tveggja, þar fékk maður matseðil sem var fullur af myndum af sveittum KFÍ gaurum og væmnu lofi um þá. Viðbjóður. Getið þið ímyndað ykkur að fara á Vitabar og matseðillinn fullur af myndum af Geir Sveinssyni og Sigfúsi Sigurðssyni í Valsbúningnum.
Ég er hálflemstraður eftir daginn, með blöðrur á puttum og svöðusár á læri, maður leggur sig fram, þannig að það er eins gott að þú kaupir plötuna með Dr.Gunna þegar henni verður keyrt í búðir.
Ég þakka svo fyrir heimsóknir hingað og í gestabókina, þótt að hún sé orðin helst til of mjúk.. er ekki hægt að koma því að í titlinum; Mjúkinskinna er það gott nafn á gestabókina.Kannski. Annars ætaði ég mér að öll skrif mín innihéldi stuðla og höfuðstafi, það er náttúrulega kolfallið.
Kveðjur til Enters fyrir góða grein á Baggalúti..
Sjáumst!
12:11 f.h. Ekki vera feiminn
10 apríl 2003
Góðan dag!
Ég sá í morgun brot af "Ísland í bítið", sem er viðbjóður, en þar var verið að tala um tísku. Ég fattaði það í morgun að ég veit ekki hvað tíska er, hver ákveður hvað er í tísku hverju sinni? Ef það eru einhverjir fávitar útí heimi sem sitja og ákveða tískuna til næstu ára, hvernig fá þeir því framgegnt að allir í heiminum fylgi þessu. Svo er það magnað að einhverjir krakkabjálfar í Sautján skuli væsgæast um eitísið sem dæmi, en voru nýfædd um það leyti. Sjálfur missi ég alltaf af tískunni, þ.e.a.s. fatatísku, sæta konan mín saumar bara á mig.
Títtnefnda konan mín vann einmitt á saumastofu Sautján og fékk sendar flíkur til sín sem þurftu að breyta. Með fötunum fylgdu orðsendingar frá krakkabjánunum í afgreiðslunni um breytingarnar og hljómuðu margar mjög skemmtilega; "þennan leðurjakka á að stytta eins og hægt er..", "athuga rassinn aftaná..", " þarf að stytta aðra skálmina á buxunum NEÐANFRÁ". Snillingar.
Jæja, hvað sem öðru líður..
SJÁUMST Á GRANDROKK Í KVÖLD KL.23.00, ÞAR SEM HINIR GEÐÞEKKU DRENGIR Í SVEIT DR.GUNNA SPILLA FYRIR DANSI.
09 apríl 2003
Þá er ég búinn að losna við mesta óbragðið og búinn að fara í "nauðgunarsturtu". Penninn að kaupa búðir Máls og menningar. Penninn er allsráðandi á ritfangamarkaði, á 11 búðir, fylla á í verslunum Baugs og í mörgum kaupfélögum út á landi. Keyptu á sínum tíma Eymundsson búðir og nú BMM, og eyða með því samkeppni á bóksölumarkaði. Vonandi að neytandinn hljóti ekki bágt fyrir það.
Nei,nei..ég dýrka Pennann og hef lengi gert. Kannski ég sæki um vinnu hjá þeim..
1:13 e.h. Ekki vera feiminn
08 apríl 2003
Nú get ég varla talað, ég er með óbragð í munninum og mig vantar að fara í sturtu..
11:57 f.h. Ekki vera feiminn
Í dag var Flassbakk-dagur hjá mér, það var líkt að ég hafi spólað til baka um eitt-tvö ár. Töluverð þynnka, kentucky fat chicken, nammi og kók. En helgin er búin að vera ansi hreint fín. Árshátíð Eddu í súlnasal Hótel Sögu í gærkvöld mjög skemmtileg. Mér finnst það eiginleg skylda að fara á svona skemmtun og einfaldlega skemmta sér eða bara hafa það næs, borða góðan mat og drekka eitthvað gott með. Við Bryndís skemmtum okkur konunglega í súlnasal, drukkum og dönsuðum, Bryndís var huxanlega ráðin í brúðarkjólssmíð fyrir brúðkaup drengsins Baldurs og heitmey hans Connor frá Vermount og þegar ég var búinn að höstla "More than a feeling" sem óskalag hjá Gullfossi og Geysi og Bryndís búin að sauma saman dansrifu á pilsi yfirmanns míns fórum við í partí á Skarphéðinsgötu, sem var fínt og seinna lá leiðin á Tuttuguogtvo. Þar var nú töluverð ládeyða hjá mér, orðinn ansi veðraður og dreif Bryndísi með mér heim, eftir að einhver hress stelpa sem kallaði sig Sjöbbí, talaði um það við Bryndísi að ég væri gull. Kannski "selstsemgull"?
Senn líður að upptökum á glænýju efni okkar í hljómsveit dr.gunna og mun Bibbi sitja við stýrið og leggst það mjög vel í mig. Þá eru tónleikar á Grandrokk á fimmtudag og hvet ég alla til að mæta.
Mig langar mjög að sjá heimildarmyndina "Hrein og bein", ég heyrði mikið talað um hana í gær, eftir frumsýningu, og hvet alla aðra til þess að langa það líka, mér skilst að hún verði sýnd næstu daga í Regnboganum og kosti ekki nema 500 kall inn. Í myndinni er víst m.a. áhrifamikil frásögn félaga míns, fjalars, um baráttu hans við að horfast í augu við kynhneigð sína.
04 apríl 2003
Hafnar eru tilraunir með gestabók á síðuna, undir styrkri handleiðslufjalars, þið bíðið væntanlega í ofvæni eftir frekari fréttum..
1:20 e.h. Ekki vera feiminn
02 apríl 2003
Nú er dagur að kvöldi kominn, hann hefur einkennst af miklum frávikum frá vinnu, ýmsir fundir, árshátíðargrín, hljómsveitastúss og almennt kæruleysi.
Nú hef ég komið fyrir nokkrum linkum hér fyrir neðan, nokkuð tilviljanakenndir en ég kannast samt við þessa menn. Fleiri eru á leiðinni, eins og til dæmis vinir okkar Bryndísar (sem er hin títtnefnda sæta konan mín);de Vidos fjölskyldan en þau eru ansi hress og þá sérstaklega Ómar Smári sem er vafalaust fyrirmynd mín í blogginu. Síðan hans er til háborinnar fyrirmyndar.
- já heyrðu Berglind, þessi spassasvipur sem þú sást í bílnum í morgun stafaði ekki af morgunþreytu, heldur af útvarpsþættinum Zombie á
X-inu. Svo bið ég að heilsa Sigga Vídó, góða ferð og ekki taka mark af bullinu sem ég skrifa um Davíð Oddsson hér á síðunni...
Ég ætla að fá mér ís í lok erfiðs dags..kjörís, þú átt það alltaf skilið!
Næsta skref er tvímælaust gestabók, en þá getur bókahomminn skrifað eitthvað hressandi, mér til uppbyggingar..
11:05 e.h. Ekki vera feiminn
Komið þið sæl,
nú er allt að gerast, kominn teljari. Áðan höfðu þrír heimsótt síðuna.. en það voru; ég fyrst, svo fjalar og svo ég aftur. Þannig að bloggið hefði átt að byrja svona...
01 apríl 2003
..alltaf að segja góðan brandara tvisvar!
..alltaf að segja góðan brandara tvisvar!
11:42 e.h. Ekki vera feiminn
Jæja, mér var nú tíðrætt um eitthvað gat á markaði bloggsins og uppfyllingu í það..það er náttúrulega bara rugl. Ég er að sjálfsögðu byrjaður með sama röfl og allir aðrir. Það er nú ekki þannig að ég hafi haft auga á einhverjum sérstökum stíl en hann kannski fæðist. Það kæmi mér samt ekki á óvart að ég héldi áfram að segja hvað Davíð er mikið drasl og þingmenn ættaðir frá Akureyri fávitar með linu "t"-i.
Ég er svona að læra á þetta, tilraunir eru hafnar með tengla, teljara, gestabók og svona basic-atriði til að teljast löggildur bloggari. fjalarol.blogspot.com er einmitt kominn með link á mig, hann er flinkur og ég reyni að læra af honum. Svo er hann svo hreinn og beinn. Svo er maður smitaður af þessum helstu síðum sem maður hefur skoðað, austur.blogspot.com er geðveikt vinstigrænn og hittir oft naglann á höfuðið varðandi ráðandi öfl í íslenskri pólitík...þið ættuð kannski bara að kjósa hann, hann er miklu stærri en flestir á þingi.
Sjálfur geymi ég minn pólitíska feril um stund, fyrst er að rokka, rækta garðinn sinn, vinna í bókabúð og svona þetta helsta en einn bjartan dag...(þá skuluð þið fá að sjá)! Það eru nú ekki allir sem vita um mína stórsigra í stjórnmálum á síðustu árum síðustu aldar.
Hvernig væri nú að steypa þessarri ríkisstjórn af stóli! Spurning um sjálfsmorðsárás? Nei, þetta var gróft. Nú hætti ég...í dag.
