bryndísar&kristjánsbörn
bryndís stefáns
gunnar hjálmars
elín smára
árný gísla
sigrún bjarna
hálfdán hálfdáns
eiríkur hrafns
karl hallgríms
örn guðmunds
birna guðmunds
kristinn hermanns
steingrímur guðmunds
páll páls
smári karls
grímur atla
vidófjölskyldan
bókabúðin mín
hljómsveitin reykjavík!

Bloggið er dautt og internetið líka. Ég las það á netinu, á einhverri bloggsíðunni!


























 
Archives
<< current













 
This is where you stick random tidbits of information about yourself.



























Ég er Kriss og ég er Rokk.
 
28 maí 2003  
Nýtt, nýtt!! Fyrripartur dagsins!
S.Bjartur er níu mánaða gamall í dag. Hann fékk í tilefni daxins graut, skyr, mjólk, dót til að naga og nýja bleiu. Hann byður að heilsa öllum. Maður er annars að ná sér eftir helgartvistinn, búinn að vera dálítið rislítill í byrjun vikunnar en það er uppstigningardagur á morgun.
Ljótar fréttir frá höfuðstöðvum Eddu, átján manns sagt upp. Nýir stjórar virðast hafa einstakt lag á að segja upp öllu hæfa fólkinu og þeir sem standa eftir virðast jafnvel vera í réttum lit. Maður er bara feginn fyrir hvern dag án uppsagnar og þurfum við sem stöndum á gólfum BMM að svara fyrir allar breytingar innan fyrirtækisins. Ég og Fjalar stöndum í því þessa dagana.
---------
Til þess að gæða Mjúkinskinnu lífi datt mér í hug að brydda uppá þeirri nýjungu að skora á hagyrta menn og konur, þ.e. lesendur síðunnar, með fyrripart sem ég bið viðkomandi að botna á síðum Skinnu. Þetta gæti orðið skemmtilegt og sá sem vonandi ríður á vaðið er sjálfur meistari stökunnar; Bragi Valdimar Skúlason.

Hér kemur fyrripartur dagsins:
Minnist ég gjarnan góðra stunda vestur á fjörðum,
sá guli synti og allt lék í ljóma við sundin blá,

Frægikarldagsins: Bryndís Mín, það var nú bara tímaspursmál hvenær hún lenti hér. Óþarfi að telja upp helstu afrek hér, en ef ekki væri fyrir hana þá væri ég varla hér. Svo fræddi hún mig um lifrakæfu í neytendaumbúðum hér í gestabókinni og þakka ég henni fyrir það. Við þurfum greinilega að tala meira saman..ef ég sæti nú ekki hér í saumaherberginu bloggandi öll kvöld, þá væri hún löngu búin að segja mér þetta!

11:31 e.h. Ekki vera feiminn

27 maí 2003  
Hér kemur helgarromsan í vacum!
Þetta var aldeilis hressandi helgi. Á föstudaginn skemmtu Homebreakers í Zombie og síðar í bakgarði 12 tóna. Það var voða gaman, annar Zombie-manna fannst við ekki skemmtileg, honum fannst við svo mikið "Kramhúsið-eitthvað", ég sé nú bara fyrir mér jógakellingar og bongótrommandi blökkumenn með langar krullur er ég hugsa um kramhúsið. Það gekk vel í garðinum, allir ánægðir og margir fóru inní 12 tóna og vildu kaupa plötuna. Hún kemur kannski seinna, allavega var Bibbi áhugasamur er hann heyrði í okkur í Zombie. Bibbi, þú skalt nú klára Flatusinn fyrst, það er hann sem skiptir máli!
Páll Einarsson ætlar að giftast Berglindi sinni í næstu viku, en hann mátti koma út að leika á föstudaginn. Svo við fórum í pool, eftir títtnefnda tónleika, Palli vildi spila allsber en hætti við vegna óupplífgandi tónlistar á poolbarnum, síðan örkuðum við niðrá Rauðarárstíg þar sem partí beið okkar á heimili Stinna(sem er ekki duglegur að blogga) og Árnýjar, en þar var einnig matgæðingurinn og snilldarkokkurinn Þorsteinn Bragi, inní eldhúsi eitthvað að fást við mat og indælis egg og beikon hann skyldi færa uppá stærðarfat. Á sama tíma og Steini gerði kraftaverk í eldhúsinu fór Palli í ljós en hann hafði aldrei áður farið í ljós. Aðspurður sagðist hann vera sæll en honum fannst heitt og var ekki sáttur með að mega ekki reykja inn á bekknum. Eftir þetta allt saman fengum við dýrindis Sleggjumáltíð og hjálpuðum síðan Palla að drekka baðkar af mjöði og notuðum slöngu og trekt, ásamt því að spila Slaughterhouse með Powermad undir.
Á laugardagskvöld var haldið í gleðskap á Lambastað á Nesi. Þar var horft á Eurovision og óþarfi að tíunda neitt um þá keppni, en djöfull sungu margir geðveikt illa og falskt. Eftir áhorfið var karaoke-tæki stungið í samband, sem var náttúrulega frábær hugmynd eftir Euro, nema hvað að lagalistinn var gjörsamlega out of our league og gerði þetta minna skemmtilegra. Annar Lambastaðarbónda lét þetta ekki á sig fá og tók Eminem og alla R&B vini hans í nefið. Hann stóð sig langbest af öðrum ólöstuðum, en aðrir sýndu góða viðleitni s.s. einsog Hulda, en hún gerði það m.a. til að á hana yrði minnst hér á síðunni.
Á sama tíma á Bergþórugötu var Stefán Bjartur í öðru partýi. Bryndís og HKL & BBL buðu honum og þáði hann eftirpartí líka, hann skemmti sér stórvel, svo vel reyndar að yfir því var kvartað af nágranna sem bað vinsamlegast um að ekki yrði skriðið svona harkalega á gólfinu eins og Stefán virtist vera að gera. Púðar voru settir á hné Stefáns svo vesalings maðurinn á neðri hæðinni, sem nota bene brýtur oft rúður í íbúðinni sinni og spilar Alice Cooper á repeat þegar hann er í stuði, gæti slakað á.
Hápunktur helgarinnar hjá okkur var að hitta Birnu Júlíu Sunnu- og Þorsteinsdóttur, sem var æði hress og yndisfögur. Hún fær mig allavega til að tala í bundnu máli og nota stuðla og höfuðstafi, sem getur orðið hjákátlegt.
- - - - - - -
Þetta blessaða símamál er vissulega magnað og verður til þess að maður fyllist hálfpartinn vonleysi. Getur enginn dottið á góða hugmynd og aflað tekna samkvæmt því, án þess að klúðra og gert á eðlilegan og löglegan hátt. Kaupþing, Skjáseinsgaurar, OZ og X18...et.cetera. Hvar eru boðberar nýrra tíma? "Árið 1999 var brotið blað í sögu íslensks sjónvarps, Skjár einn birtist í boði Símans.." Er búið að handtaka Darra? Ég ætla að leyfa þeim Árna og Kriss Ra að njóta vafans uns sekt þeirra er sönnuð..
Og nenni ekki að tala um þetta meira, mig langar miklu frekar að vita hver munurinn er á blárri og rauðri lifrarkæfu frá KEA?? Ef þið vitið svarið, skrifið í Gestabókina.

10:11 e.h. Ekki vera feiminn

 


Nei nei, kom ekki bara mynd. En skemmtilegt. Þarna á myndinni má sjá pabba minn (til vinstri), hann er þarna voða hress og að mér sýnist á kosningaskrifstofu Frjálslyndra. Auðvitað var hann þar, enda fásinna að vera annars staðar á kjördag..

1:17 e.h. Ekki vera feiminn

 
Afsakið hlé!
Voða er leiðinlegt hve slappur ég er orðinn í skrifum hérna. Þetta er orðið svona vikulegt, eins og Bæjarins besta. En maður á aldrei að afsaka sig heldur að hysja upp um sig... Það verð ég hinsvegar að gera í kvöld.
Þangað til..

1:07 e.h. Ekki vera feiminn

22 maí 2003  
(ég finn ekki neina sniðuga fyrirsögn)
Komið þið sæl, ég ætla að bíða með að myndskreyta færslurnar, ég er ekki orðinn nógu klár þrátt fyrir að hafa t.d. verið í læri hjá meistara Fjalari. Við vorum eitthvað að skoða þetta í dag en það var bara svo mikið að gera svo að Fjalar ætlar að taka sér frí á morgun og komast til botns í þessu máli.
Nóg að gerast um helgina; Homebreakers í fyrramál í Zombie FM 97,7 kl. 8.30 og síðan kl. 17.00 í bakgarðinum hjá 12 Tónum. Svo ætlum við vinir hans Palla Einars að fá að leika við hann áður en hann giftist Berglindi. Við ætlum að sjálfsögðu að vera geðveikt flippaðir, við rökum okkur allir að neðan og búum til skegg sem Palli klæðist svo allan tímann.

..ég verð að þjóta á æfingu, frægikarldagsins: tvímælalaust Karl Guðmundsson leikari sem söng í bókabúðinni í dag, við það tilefni að hann fékk eldriborgaraafslátt, " það er svo gott að vera gamall".

Homebreakers: Zombie kl.8.30 og síðdegis í 12 Tónum kl.17.00

10:12 e.h. Ekki vera feiminn

 
..ég get ekki sagt að þetta sé besta myndin af Stefáni. Hún er soldið sérstök.

6:13 e.h. Ekki vera feiminn

21 maí 2003  
Mínus í kladdann..
Sæl aftur,
hér að neðan, í síðustu færslu, má sjá litla bögu sem er tileinkuð dóttur Steina og Sunnu. Hún fæddist á sunnudagskvöldið, vó 18 merkur og var um 55 cm. á hæð. Gradulere.
Stefán Bjartur var mjög ánægður að fá stelpu í hópinn. Hér er skemmtileg mynd af Stefáni sem frændur hans frá Lambastað tóku í partýi á dögunum:



Annars gengur lífið sinn vanagang, Bryndís mín eldaði ilmandi grjónagraut oní karlinn sinn, hann mig, meðan ég gaf SBK grautinn sinn. Ný ríkisstjórn að myndast, málefnasamningur tilbúinn, hann hefur fengið heitið "Stöðugleiki 2003". Ætli þessir fávitar viti hvað stöðugleiki merkir.
Davíð = Halldór
Kúkur = Skítur
Ég vil biðja fréttastjórn sjónvarps vinsamlegast að forðast að hafa Andrés Magnússon á skjánum meðan maður er að borða grautinn sinn. Maður fær óbragð í munninn.
Djöfull held ég að það sé leiðinlegt að vinna á þessari vetnisstöð. Hvað ætli að séu margir vetnisbílar í umferð?

Sæll Haukur og þakka þér fyrir athugasemdina. Jú, vissulega eru atkvæðin mörg á stökustað, t.a.m. í fjórðu braglínu í kvæðinu hér fyrir neðan. Það mú búast við fjölda tilbrigða við hina ýmsu bragarhætti, en almennt er ferskeytlan heppilegt form hér, þegar ég kýs að bregða fyrir mig bundnu máli. Lesendur hafa í aðdáendabréfum sínum verið að óska eftir t.d. sonnetum, fornyrðislagi og hverskyns tegundum á rími s.s. einsog innrími, víxlrími og illrími. En eins og flestir vita er ég mikill áhugamaður um slæmt rím.
Frægikarlgærdaxins:
"Ég þekki Hauk
gæðaskinn!
Það í mig fauk
er hann vildi ekki öll atkvæðin"

Frægikarldagsins:
"Honum er margt til lista lagt
en borðar sjaldan mör
hvernig er þetta hægt
Benedikt LaFleur"

9:44 e.h. Ekki vera feiminn

19 maí 2003  
Frægikarlgærdagsins:
"Lítil sleggja ljúf og fögur
í heiminn kom með fagursöng
hún vekur upp gleði og sem ég bögur
um stúlkuna sem syngur sumarkvöldin löng".


12:24 e.h. Ekki vera feiminn

18 maí 2003  
Heima er best!
Helgin hefur verið nærri tíðindalaus. Við höfum haft það fínt og sýnt stillingu við hvert það áreiti sem uppá hefur borið. Þau hafa nú varla verið nein, reyndar hélt Rúnar kokkur partý hjá sér og var boðið uppá Shakiru á fullu blasti. Eitt er að vera kúl og eiga kúl græjur, svo er annað að velja tónlist..! Fyrrum nágrannar okkar voru skítugir iðnaðarmenn með múrhúð í hári og olíubrák í munnvikinu, komu heim úr vinnu á föstudegi og blöstuðu "..and I will always love you" með Whitney Houston. Þar fór öll virðing í þeirra garð á bak og burt. "Hvar er Motorhead strákar"!
Bryndís systir kom til okkar í mat í gær, Bryndísarsynir voru hinsvegar á flakki með föður sínum. Síðan kom hér Vídó-fjölskyldan í heimsókn, sem var mjög viðeigandi á þessarri Godfather-helgi. Við buðum þeim kaffi, vínarbrauð og súkkulaðiköku, tilboð sem þau gátu ekki hafnað.
Þessa stundina er hinir kæru vinir okkar þau Hr. og Fr.Sleggja á fæðingardeildinni. Við sitjum spennt og sendum góða strauma yfir Miklubraut og uppá spítala.

Frægikarlgærdagsins:
Lítið er það annað en hið blessaða veður
sem hann Páll Bergþórs hefur áhuga á
það er bar´allt dónó sem rímar við veður
þetta er komið í óefni, ég hætta má.

8:10 e.h. Ekki vera feiminn

16 maí 2003  
Nýtt! Frægi karlinn í bundnu máli..!
Það er lítið um að vera um helgina. Ég er að hugsa um að verja henni í að horfa á Guðföðurinn. Annars er ég að fara að vinna í bókabúðinni á morgun.
Djöfull, hvað ég hata helvítis stuðmannalagið "með allt á hreinu". Hvað ætla JFM hafi dílað við Íslandsbanka um margar kúlur fyrir lagið í auglýsingar? Ég hef ákveðið að gefa þeim einn mánuð til að henda þessu lagi í ruslið annars færi ég öll mín viðskipti til Björgólfs!

Frægikarldagsins: Í dag kom í búðina Vala Matt
hló hún dátt allan tímann
en ekki af okkur, ég hef fyrir satt
því hún var bara að tala í símann

10:10 e.h. Ekki vera feiminn

 
..ég er hér aðeins að prófa, nýtt trix sem er í boði..:



ef þetta hefur heppnast, þá er þetta mynd af Steingrími félaga mínum, en hann og URI hafa verið duglegir við að ausa yfir mig fróðleik varðandi HTML-ið, einhvern daginn mun ég geta þetta á eigin spýtur.


5:04 e.h. Ekki vera feiminn

15 maí 2003  
Áfram K.R.
Maður verður latur í svona góðu veðri. Miklu frekar myndi ég nenna að sötra öl eða sparka bolta heldur en að afgreiða bækur... Nei, nei Gunnar minn Dungal, ég er bara að grínast.
Fékk í dag senda nýju Mínusplötuna Halldór Laxness frá Kiddarokk. Platan er frábær í fyrstu hlustun, ég hlustaði á hana áðan þegar ég var að vaska upp, ég var reyndar svo fljótur með uppvaskið að ég náði bara sex lögum. Ég get ekki hlustað á tónlist án þess að gera ekki eitthvað annað líka. Best er að keyra og mjög gott að vaska upp.
Annars er ég gjörsamlega hooked á plötunni Söngur riddarans, þar sem Þórarinn Hjartarson og Ragnheiður Ólafsdóttir syngja lög við ljóð Páls Ólafssonar. Þetta hljómar kannski eins og grín mér finnst þetta frábær plata og falleg. Ég skora á ykkur að tékka á henni ef þið þekkið hana ekki. SigurRós er bara djók miðað við þetta.
Ég fór á forsýningu á myndinni Bad boy Charlie, þar sem fylgst er með stripparanum Charlie sem hefur nú lagt G-strenginn á hilluna og er í dag öryrki, svo mikið var uppi á honum typpið um tíma. Myndin var fín, þarna var greinilega fagmaður á ferð.
Þakka gestum skinnu fyrir komuna, en bið Ottó afsökunar fyrir misskilning; auðvitað var hann að meina vel, "áfram KR" það er "áfram Kriss Rokk!

Frægikarldagsins: Óttarr Ólafur Proppé, umsjónamaður erlendra skáldverka jafnt og fagbóka í Bókabúðum Máls og menningar (þetta er fyrir aðdáendur titlatogs). Óttarr sem er einn Glysgirnismanna og kunnur sem mikið gæðablóð, gaf mér miða á téða forsýningu. Við ræddum stuttlega í dag sameiginlegt áhugamál, sem er vondir nágrannar, en við höfum margan hildinn háð við þá pest. Óttarr gerði litla könnun á þessu og komst að því að eitt eiga þeir sameiginlegt og það er að spila Queen mjög hátt stillt. Ég hinsvegar var ekki svo heppinn heldur fékk oft að heyra spænsku munkatónlistina með bítinu undir, þegar ég bjó á Klapparstíg. Þegar ég heyri þessa tónlist fyllist ég vonleysi og algeru tímaleysi. Kom þá upp úr krafsinu að Óttarr þekkir fólkið sem bjó til þessa diska með spænsku munkunum. HAM var víst með sama umboðsmann í USA, og þessir aðilar og sömuleiðis Enigma. Þvílík samsuða.

11:52 e.h. Ekki vera feiminn

14 maí 2003  
"jæja, á svo að hafa það huggulegt?"
Yndislegur dagur. Ég vil óska þjóðinni til hamingju með forsetann sem hélt víst gott partí í Borgarleikhúsinu. Einnig óska ég þjóðinni til lukku með Unnar frænda minn, ég veit ekki hvar hans partí var haldið. Ég sá að Denni birti einmitt mynd af Unnari í dag, en ég kann ekkert að setja mynd inná síðuna? Á ég að geta það? Áhugasamir leiðbeinendur hafi samband, kristjan@bmm.is eða á Mjúkinskinnu.

Það fer að líða ár síðan við fluttum úr vesturbænum hingað í austurbæinn og okkur líður vel. Munurinn er þó einhver, vesturbæingar er margir hverjir KR-grobbhænsn sem er náttúrulega viðbjóður, en við bjuggum við Drafnarstíg í gamla vesturbænum og það var hlýleg stemning, sem mátti sjá glöggt í myndinni Regínu. Hér í Barmahlíðinni er gott að búa en það er helst að þjónustustigið sé æði lakara. Hér er Sunnubúðin, þar sem mjólkurpotturinn kostar um 100 kr. og enn skreyta jólasveinamyndir kókflöskurnar. Starfstúlkurnar eru allar gráhærðar líka sumarstelpurnar sem eru varla fermdar. Svo er það sjoppan Bónusvídeó, þar sem ég keypti Toffee Crips um daginn sem mér tókst aldrei að naga í sundur. Ég ætla að geyma það ef ég fæ mér einhvern tímann hund. Henný Hermanns á sjoppuna og ekki fyrir löngu kíktum við Gunni þangað til að kaupa nammi, fyrir okkur og konurnar. Hún glotti fremur óþægilega og spurði; "jæja, á svo að hafa það huggulegt í kvöld?", ég man ekki hverju við svöruðum en á leiðinni úr sjoppunni föttuðum við að hún hefur haldið okkur vera homma. Hún getur bara sjálf verið hommi

Annars er Gunni kominn með fínan tékklista fyrir næstu kosningar, hann verður ekki lengi að fyllast. Þegar ég var að fara í gegnum videóspólurnar mínar um daginn, rakst ég á gamalt uppistand, hugsanlega síðan 1996, með Tvíhöfða. Þar tóku þeir frábært pönklag, sem ég get því miður ekki leyft ykkur að heyra, en hér koma nokkur textabrot sem gaman verður að leika sér með þegar mynduð verður ný ríkisstjórn, því alltaf má breyta nöfnum þingmanna (sumum nöfnum þarf þó ekki að breyta);

"Á Íslandi ræður fasistaher,
sem rúnkar sér á þér og mér
Davíð Oddsson er hommalegur
og ríður Jóni Baldvin í rassgatið.

Jóhanna Sig er lesbíubelja
sem nýtur þess að pynt´og kvelja
Vigdís forseti er gömul mella
sem veit ekki neitt um anarkí

Matthías Bjarnason er hommi
það eru allir á ekstasí á Alþingi..
fasistar, fasistar, fasistar, fasistar.."

Frægikarldagins: Guðni Finnsson, bassasnillingur og með eindæmum geðugur piltur. Guðni var einu sinni í hljómsveitinni Formaika, en var rekinn af því hann var svo flinkur og fúnkaður. Guðna finnst gott að vera í Superman-búning.

11:52 e.h. Ekki vera feiminn

13 maí 2003  
Ég er kominn á kreik á ný..
Jæja, djöfull er maður nú hress svona þegar kosningaviðbjóðnum er lokið. Sumarið að koma. Í óðaönn er verið að óverdöbba Flatusinn í stúdíóinu hjá Bibba. Snilldarverk í sjónmáli, þar sem allir fá eitthvað fyrir sinn snúð. Snakk fyrir pakk.
Svo er ég nú, í hliðarspori, að spila með nokkrum stúlkum, þ.e. hljómsveitinni Homebreakers, en við spilum finnska tangótónlist ásamt vel völdum perlum úr smiðju amerískrar sveitatónlistar. Með mér í bandinu eru; Elín Hrund bassaleikari sem er í læri hjá Guðna Finnssyni, Ólöf Sigríður söngkona sem fer stundum til Ítalíu að heimsækja Kristján Jóhannsson, Olga Bergmann hljómborðsleikari sem kallar sig oft Dr.B og Riina Eldon gítarleikari sem er gift Ara Eldon fyrrum Blessverja. Þetta er voðaskemmtilegt band sem mun einmitt skemmta í 12 Tónum aðra helgi. Ég mun minna ykkur á það.

Fréttamaður á Rúv sagði í kvöldfréttum að kosningaauglýsingarnar skyggðu ekki lengur á Esjuna. Sem minnir mig enn og aftur á það hversu þessi Esja er fokking ofmetið fjall. Hvað er að Reykvíkingum? Hafa þeir ekki séð fjöll? Sjálfur var ég heillengi að fatta að litla fellið þarna hinumegin væri blessuð Esjan. Búlandstindur, Kirkjufell og Kubbi, eru fjöll með karakter. Mér finnst Esjan ekki sjúkleg, mér finnst hún púkaleg.

Hlakka til að fá skattalækkun og alla velmegunina í boði X-D og X-B, en fyrst verða þeir nú að fá smá kauphækkun....já, það er búið að koma því lög. Það var laglegt. (þetta kjósið þið yfir ykkur án þess að hugsa)

Frægikarldagsins: Halldóra Geirharðsdóttir, kom í búðina í dag og er ólétt (eins og Sunna, Bjarnveig, Riina og Sigrún María), ég sat eitt sinn á kaffihúsi ásamt dóru wonder og sameiginlegum vinum okkar, hún var nýkomin af námskeiði hjá Paul Welsh, og þagði mjög mikið og brosti bara, síðan á leiðinni út sagði hún við mig að ég væri mjög sérstakur...?? Segir hver!

11:07 e.h. Ekki vera feiminn

11 maí 2003  
Líf, ljómi þinn er skínandi skær!
Það var fallegur dagur sem vakti mann í dag, sólin brosti. Ég og SBK löbbuðum út í góðærið, löbbuðum um hlíðar Reykjavík-Suður og stöðugleikinn lék við okkur.
Ég og Rúnar unnum í garðinum. Grasið óx. Allt er í blóma.

10:03 e.h. Ekki vera feiminn

 
Það skiptir máli að velja rétt!
Hann var geysierfiður gærdagurinn og einkenndist af erfiðum ákvörðunum. Við fórum í verslunarferð, skoða föt og slíkt sem er einn helsti veikleiki minn ef ekki sá eini. Ég á ótrúlega erfitt með að kaupa mér föt og orkan sogast nær úr mér þegar ég nálgast fataslá. Við fórum í bæði Kringluna og Smáralind, vorum á ferðinni nánast allan eftirmiðdaginn og kusum síðan á leiðinni heim. Ég sofnaði í kjörklefanum þegar ég stóð frammi fyrir einni erfiðri ákvörðuninni enn. Allt saman fór þetta nú samt vel að lokum, ég keypti nokkra larfa og skó og mér tókst að krossa á seðilinn, en sleppti ljóðinu. Ég vil þakka starfsmönnum í Kjördeild 1 í Hlíðaskóla, og þeim sem mest mæddi á, nefnilega Bryndísi og Stefáni Bjarti fyrir óendanlega þolinmæði og umburðarlyndi á þessum erfiðu tímum.
Um kvölmatarleytið héldum við svo á kosningarvöku til Palla og Berglindar, í norðurmýrina. Við grilluðum saman og höfðum það gott. Saman gátum við svo huggað okkur við það, í enda kvölds, að góðir Íslendingar skyldu ná að afstýra öllum glundroðanum sem í stefndi. Okkur fannst spaugstofan frábær.
Frægikarldagsins: Njáll Eiðsson, kennari og knattspyrnumaður. Sorrí, ég bara hitti ekki neinn frægari en Njál. Hann var að kjósa á sama tíma og við.

8:38 e.h. Ekki vera feiminn

 
Traust, Öryggi, Stöðugleiki, Skattalækkun, Velferð, Kaupmáttur, Kaupþing.
Fjúkk!

8:15 e.h. Ekki vera feiminn

09 maí 2003  
Á morgun hefst krossferðin, setjið krossinn á réttan stað!
Já, komið þið sæl og velkomin að skjánum. Mér tókst engan veginn í gærdag að fá næði til skrifa. En gerði margt annað skemmtilegt. Til dæmis fórum við Bryndís og Stefán, með uppbrett nef, á opnun sýningar í Hafnarhvoli. The amazing design kids sýndu þar uppskeruferð sína til Mílanóborgar í aprílmánuði og er sýningin stórskemmtileg og ástæða fyrir alla að missa ekki af henni. Eftir það beið okkar rjúkandi miðar í Borgarleikhúsið þar sem stefndum á sýninguna Kvetch. Smalinn Jón frá Lambastöðum er einn framleiðenda sýningarinnar, sem var til háborinnar fyrirmyndar í alla staði.
Leikararnir (sem betur fer voru einhverjir eftir í húsinu..) stóðu sig frábærlega, allir með tölu og uppfærslan var meiriháttar. Ég get ekki sagt að ég hafi séð allt sem er á fjölunum en án efa eru uppfærslur þeirra Á senunni á Kvetch og Vesturports á Rómeó og Júlíu þær sýningar sem standa uppúr á þessu leikári. Eitthvað annað en Þjóðleikhúsið (sbr. blogg síðasta sunnudags ).
Að láta Kvetch framhjá sér fara er eins og að fara í gröfina án þess að smakka rjóma.
Eftir leikhús fór ég á æfingu með hljómsveitinni Homebreakers, sem spilar ameríska sveitatónlist og finnskan tangó. Við erum að fara spila í boði í Norræna húsinu eftir helgi en komum fram í Tólf tónum, föstudaginn 23.maí, kl.17.00. Meira af því síðar.
Að endingu þakka ég lesendum fyrir að skrá sig á spjöld skinnu en þar hefur félagi Ottó komið við, en hann er varðstjóri á Ísafirði og mun sjá um að allt fari löglega fram hér á síðunni, Sleggjan hrósar mér fyrir skrifin, takk og margt er hægt að segja honum til hróss. Síðan reit systir mín nokkra stafi í bókina, en fyrir þá sem ekki vita er hún endalaust STÓR og býr hún í "bárujárnshúsi við Bergþórugötuna" og eftir því sem ég best veit er Davíð Oddsson ekkert endilega velkominn þangað sama hvað hann raular og tautar...

Frægikarlgærdagsins: Párl Einarsson, one of the amazing design kids, jafnverklagnasti maður í heimi og mun ganga að eiga Berglindi sína í Tékklandi í júlí.
Frægikarldagsins: Tapio hinn finnski, gamall smíðakennari sem kenndi okkur m.a. að smíða stól eða koll í gaggó. Einn af strákunum sagði honum hinsvegar að þessi nytsamlegi hlutur héti ekki kollur heldur "böllur" og þótti það heldur betur vandræðalegt þegar hann sagði nemendum sínum að vera duglegir að pússa "böllinn" og sína svo mömmu og pabba..

11:06 e.h. Ekki vera feiminn

07 maí 2003  
Það eru svo geigvænlegar hreyfingar á fylgi flokka að enginn er öruggur inni... nema Árni Johnsen!

Ég hef lítinn tíma akkúrat núna, ég þarf að fara að horfa á Silfur Egils. Annars var ég í vorverkum útí garði, laga gluggana og smíða virkisveggi sem rottur komast ekki yfir..
Ég er að hugsa um hvort ég verðlauni þúsundasta gestinn, sem nálgast óðfluga, allar hugmyndir vel þegnar á Mjúkinskinnu.

Frægikarldagsins: Hjörleifur Valsson fiðluleikari og almennur snillingur. Hann kom í dag í búðina og keypti góðar bækur og er hann að safna fornritunum. Okkur Hjörleifi er vel til vina í dag en ekki svo í æsku. Ein af svartari æskuminningum mínum frá Hnífsdal er sú þegar ég og vinir mínir, Smári Ólafs og Bjarni Maríus, vorum staðráðnir í því að stofna hljómsveit. Ég skyldi spila á trommur og kaupa Maxtone-settið sem til var í Seríu, Bjarni á bassa og Smári á gítar. Okkur fannst, þennan fallega haustdag árið 1985 á að giska, að við ættum heiminn og myndum vafalaust sigra hann áður en langt um liði. En nei..mætum við ekki Hjölla og Venna hrekkjusvínum á næsta horni og voru þeir þá búnir að heyra af nýja bandinu. Þeir hlógu að okkur, léta mig tromma á lær, einhverja æfingu sem ég náði alls ekki, spurðu Bjarna hversu margir strengir væru á bassa og ekki gat Smári heldur svarað því hvað grip væri. Hljómsveitin hætti á þessu götuhorni í Hnífsdal.

Bestur var samt alltaf hann Maggi Dýró sem var skáti og staðráðinn í því að læra á bassa, en ekki gítar eins og allir hinir.
-"..og svo ætla ég að kaupa mér rafmagnsbassa og kontrabassa"
- en Maggi, af hverju rafmagns- og kontrabassa?
-" maður fer ekki með rafmagnsbassa í skátaútilegur.."

11:03 e.h. Ekki vera feiminn

06 maí 2003  
Mál og menning... fyrir þotuliðið!
Að beiðni tryggustu lesenda minna mun ég hefja hér stuttan annál um helstu og frægustu vini okkar sem heimsækja okkur í bókabúðina. Þessi stutti annáll mun að sjálfsögðu kallast á við Frægakarldagsins, en meira af honum síðar. Að gefnu tilefni vil ég nefna að við í BMM erum traustsins verð og erum ekki að skrafa um það hvað elskulegir viðskiptavinir okkar eru að kaupa, og hvort eða hvernig þeir borga. Sökumæsu er Chelsea Clinton til dæmis ekki lengur með neitt lánstraust hér á landi .

Fyrstan má frægan telja Þorstein frá Hamri, sem hefur góð áhrif á alla í búðinni og get ég ímyndað mér að guð líti sirka út eins og Þorsteinn, Hjalti Rögnvaldsson leikari, er bestaskinn og á hann fleiri bækur en birgðastaða búðarinnar telur, Sjón kemur daglega, glaður í bragði og við sleppum honum ekki út fyrren hann hefur sagt okkur að minnsta kosti eina skemmtilega sögu, Guðný Ýr, ekkja Sigfúsar Daðasonar, átti leið hjá þegar hún mundi varla hvort Vefarinn hafi fyrst komið út 1926 eða 27, hún fer upp og biður Önnu að hjálpa sér,Odd Nerdrum arkar úr Þingholtunum til okkar í kaffi og höfum við oft á tilfinningunni að hann sé í miðjum tökum í nýjustu mynd Hrafns Gunnlaugssonar, Oddur Þórisson stílisti er alltaf eins og klipptur út úr tískublöðunum og ætti hann skilið að fá themesong þegar hann birtist, Illugi Jökulsson er ekki með neinn stílista, Eggert Þorleifsson er alltaf jafn fyndinn og næstum jafn fyndinn og konan hans, Sigurður Pálsson tekur púlsinn á Le monde, Trausti Valsson skipulagsfræðingur gefur okkur góða einkunn fyrir feng shui-ið í búðinni, Atli Heimir er alltaf jafn hógvær og biður frænku sína að elda með sér súpu..fyrir tólf manns, Sigurður Líndal segir ekkert vanhugsað heldur vitnar hann í Helgakver í hvívetna, Ragnar Aðalsteinsson lögmaður er maður fólksins og verður örugglega jólasveinn þegar hann hættir á stofunni, hann er allavega kominn með rauðan trefil, Ólafur Ragnar kemur ósjaldan, á maður að gefa forsetanum afslátt?, Vigdís Finnboga er með sérstakan afsláttarfulltrúa, Ármann og Sverrir koma til að tékka á ritgerðunum sínum, Megas man sjaldnast í hvaða erindagjörðum hann er, Jón Gnarr veit að það er ekki plebbalegt að versla í BMM, Jón Ásgeir, litli baugur, neitaði harðlega að skrifa undir strimilinn með rauðum penna, vildi bara bláan!
Vitaskuld eru það fleiri sem ættu heima á þessum lista s.s. einsog; rauðhærði nasistinn, prumpukonan, Bjarni með stafinn, hinn aldraði þjófur í grænu úlpunni og Árni Haukur, sem er perla, en kannski kem ég bara með fleiri síðar...

11:30 e.h. Ekki vera feiminn

 
"Þetta er niðurtalning, dudududu dududududu..!
Hún er byrjuð, vikan fyrir kosningar, og ég er ekki ákveðinn. Rosalega finnst mér þetta óspennandi. Nú er maður orðinn Reykvíkingur á pappírum og kýs í Rvk-suður en þar er allt á suðupunkti. Yfirleitt er ég nú fastari fyrir en þetta. Þetta er bara svo fíflalegt allt saman, þessi framboð! Þetta er bara grín! Nýtt afl, hvað er það? Það er hvorki neitt nýtt við það og er ekkert afl. Hvar er Funklistinn?
Nú er ég búinn að halda þessa dagbók hér í nokkrar vikur og haft gaman af. Fullt af lesendum, góð viðbrögð og vinir mínir nenna ekkert að hitta mig lengur, lesa bara á netinu...bið að heilsa ykkur! Það gleður mig að mér skuli hafa tekist að blása lífi í Kristin Hermannsson á netinu, það virkar örugglega sem innspýting á mig. Það verður án efa skemmtilegt að fylgjast með honum og hans þönkum, reyndar ætlaði ég einmitt að fara tala um Framsóknarflokkinn en jæja...
Ég fékk hugmynd að hressilegri nýjungu á síðunni sem ég ímynda mér að byrja með eftir helgi. En næsta vika verður þá svona þemavika tileinkuð öðrum bloggverjum.. fylgist með frá byrjun.

Frægikarldagsins: Svavar hljómborðs- og gítarleikari í Rúnki, en hann er í óðaönn að klára lokaverkefnið í listaháskólanum sem á vera tilbúið á laugardag. Verkefnið hans er borðspil í ætt við Matador sem kallast "Á túr" og þar er hljómsveit að túra hringinn í kring um landið og hver meðlimur safnar rokkpunktum og grúppíustigum og sá vinnur sem hefur flesta punkta er hringnum er lokað á Broadway.

12:50 f.h. Ekki vera feiminn

04 maí 2003  
Play it safe!
Jæja, krakkar mínir hvað ætlið þið svo að kjósa á næsta laugardag? Eru þið búin að gera upp hug ykkar? Hvað eruð þið velta ykkur uppúr þessu:
Kjóstu Sjálfstæðisflokkinn.
Haltu með KR.
Haltu með Manchester United.
Haltu með Michael Scumacher.
Hlustaðu á U2.
..og þá verður allt í stakasta lagi!

11:31 e.h. Ekki vera feiminn

 
Frægikarlgærdagsins: Jón Örn, sviðsmaður hjá Þjóðleikhúsinu og vinur hans Gunnars. Hann kom fram í einu atriðinu í Rauða spjaldinu og mér fannst hann bera af.
Frægikarldagsins: Linda Ásgeirsdóttir, sem er hve þekktust fyrir að leika Sollu Stirðu en við S.Bjartur hittum hana niðrí bæ og hún sagðist vera búin að ákveða að kjósa, og henni fannst Stefán sætur en Stefáni fannst hún skrýtin.

11:31 e.h. Ekki vera feiminn

 
Spegill, spegill..!
Við Bryndís fórum í Þjóðleikhúsið í gær í boði Eddu og fengum að sjá Rauða spjaldið. Ég hef almennt voða gaman að því að fara í leikhús og er hægt að bjóða mér uppá ansi margt án þess að ég hlaupi út. Ég fór nefnilega fyrir nokkrum árum á uppsetningu Borgarleikhússins á Djöflunum eftir Dostojevskí og eftir það er ég nærri ónæmur fyrir hverskonar leiðindum í leikhúsum landans. Mér leiddist ekkert endilega í gær en það var alveg laust við það að þetta hafi verið skemmtilegt. Stykkið er svona þjóðfélagsspegill, íslenskt samfélag í hnotskurn og af hverju að setja það endilega á svið? Er ekki nóg að fylgjast með lífinu utan leikhússins. Þarna voru framhjáhald, ungir peningaplebbar, unglingavandamál og almennt siðleysi í aðalhlutverki og vafalaust margur séð sjálfan sig þarna upp á sviði.
Það besta í þessari leikhúsupplifun gærkvöldsins var uppklappið þar sem enginn leikarana brosti og voru upp með sér eftir frammistöðuna, þvert á móti var eins og þeir skömmuðust sín. Ég veit ekki hvort ástæðan var hið dramatíska umfjöllunarefni eða hið meingallaða handrit. Jafnskondið var að labba út úr leikhúsinu að sýningu lokinni að sjá alla gesti sem voru hoknir, litu í eigin barm, sögðu ekki neitt, löbbuðu svo vafalaust beint útí bíl, þögðu alla leiðina og hófu svo blóðugt uppgjör þegar heim var komið...

5:05 e.h. Ekki vera feiminn

03 maí 2003  
Þekkið þið einhvern sem vinnur óeigingjarnt með fjölfötluðum og einhverfum einstaklingum..?
Palli frændi minn vinnur á einbýli fyrir samhverfa!

.. langaði bara að segja ykkur frá því.

3:32 e.h. Ekki vera feiminn

02 maí 2003  
De Vidos - fjölskyldan kom í mat, Bryndís eldaði dýrindis fiskrétt, haframjölsskreyttan í tómatbaði, svo komu þau með svívirðilega góða ostaköku. Ómar Smári og Stefán Bjartur báru saman bækur sínar en Ómar getur sýnt fólki hvað hann er sterkur meðan Stefán hefur náð að segja hversu stór hann er.
Við S.Bjartur fórum í kröfugöngu í dag og fengum frændur okkar í lið með okkur, þá Halldór og Bárð Bryndísarsyni. Við vorum mjög kröfuharðir þegar á leið og þegar mest lét á sveiflaði Bárður svo óður væri B.S.R.B fána og Halldóri varð tíðrætt um jafnrétti milli kynjanna en fékk svo sand í auga en beit síðar svo um munaði á jaxlinn, og hélt áfram. Eftir gönguna var boðið í kaffi á Bergþórugötu.

Frægikarldagsins: Þorsteinn frá Hamri, í raun hitti ég hann ekki í dag en sá þátt um hann í sjónvarpinu. Hann heimsækir okkur oft í BMM, er mikið gæðablóð, mikill húmoristi og segir ægiskemmtilega frá. Hann sagði mér frá veru hans vestur á fjörðum, þar sem innfæddir sjóarar reyndu að lemja hann og Guðjón Friðriksson, S.A.S, (sérfræðinga að sunnan), en sagði að penninn hafi þá oft sigrað sverðið. Hér er eitt ljóð sem hann samdi á þessum tíma:
Örnefnaskrá úr Skutulsfirði
Land þarsem lág fjöll heita hnífar
land þar sem hvassir tindar heita þjófar
land þar sen maður lítur á sig sem ránsfeing:
lamb sem var stolið.

Í kvöld gleymir lambið
að kofi þess stendur á dagverðardal:
í kvöld sýngur mig í svefn
lækurinn úlfsá.

12:24 f.h. Ekki vera feiminn

01 maí 2003  
Bókahomminn fer mikinn á síðu sinni. Hefur greinilega lent í speisuðu spjalli á kaffistofunni, en ég missti af því, heyrði samt að verið var að skrafa um muninn á klæðskiptingum og kynskiptingum. Ég treysti því að Fjalar segi mér frá því síðar.
Prumpukonan hins vegar er kona sem hefur lagt mig í einelti í bókabúðinni. Á tímabili þróuðust mál þannig að ég var einn í deildinni um hálfa klukkustund þegar aðrir voru í mat og birtist hún þá stundvíslega kl.12.30. Fyrst labbaði ég að henni og bauð aðstoð en hún hristi bara hausinn, ég sneri þá aftur að afgreiðsluborðinu, fáir voru á ferli, önnur kona í pels var að líta í Ísland í aldanna rás þegar konan byrjaði að prumpa. Ég leit upp og vissi ekki hvaðan þetta hljóð kom, konan í pelsinum setti upp fyrirlitningarsvip og rauk út. Prumpukonan lét gamminn geisa. Því miður er ég ekki með hljóðkort í tölvunni annars myndi ég reyna að koma þessum óhljóðum til skila. Óþefjan var hinsvegar í lágmarki.
Þetta endurtók sig í nokkur skipti þangað til að bað yfirmenn mína að gera eitthvað í þessu, ég treysti mér ekki til að vera einn. Það varð úr að Fjalar var færður um vakt og hef ég orðið fyrir frekari áreiti æ síðan. Annars hefur konan endurtekið komið inn á þessum tíma, síðast í gær, en séð að ég er ekki einn míns liðs og hlupið út eins og vindurinn. Greyið konan á við vandamál að stríða, vitaskuld mjög erfitt að lifa eðlilegu lífi með hundslappan hringvöðva. Svo er blessuð konan með húrrandi áhuga á heimsbókmenntum, kíkir í bækurnar, byrja þá rymjandi óhljóð úr afturendanum og hún hendist út. Hún hlýtur að geta hringt bara í okkur...

12:53 e.h. Ekki vera feiminn

 
Líf eftir rottu, tvö viðbjóðsleg haust og polyesterdrulla.
Jæja, nú er fjölskyldulífið nánast komið í samt horf. Allir búnir að fara í sturtu, martraðir fara dvínandi og matarlystin að koma. Bryndís saumar til að gleyma, Stefán borðar og kúkar til að gleyma og ég fer á bókakynningar og tónleika til að dreifa huganum.
Ég sá um bókakynningu á Súfistanum í fyrrakvöld að beiðni rithöfundanna; Braga Ólafssonar, Sigurbjargar Þrastardóttur og Gyrðis Elíassonar. Það tókst eindæmis vel. Þau gáfu mér árituð eintök af bókum sínum og er ég byrjaður að lesa bók Braga, Við hinir einkennisklæddu og get mælt með henni.
Í gær fórum við Gummi hinsvegar á tónleika á Grandrokk sem voru í boði ungliðahreyfingar VG. Við fórum fyrst og fremst til að sjá brjálæðingana í hljómsveitinni Ekkert Kjaftæði en undan þeim lék, svo óheppilega, hljómsveitin Tvö dónaleg haust. Mér hefur aldrei liðið jafn vandræðalega meðan ég horfði á þá, mér fannst eins og allir væru á horfa á mig og ég ætti hrerinlegast að skammast mín fyrir að vera þarna. Þessi hljómsveit er sú leiðinlegasta sem ég hef heyrt í. Eiithvað svo glötuð. Þeir voru ágætlega spilandi en tónlistin rosalega fyrirsjánleg, óspennandi og klisjukennd. Söngvarinn er jafnsjálfumglaðasti uppskafningsrembingur sem ég hef séð á sviði og djöfull sem honum langar að vera poppstjarna. Ég mæli með þessari hljómsveit ef þið viljið gleyma annarri óskemmtilegri reynslu. Martraðir mínar í nótt voru alls ekki heimsóttar af rottum heldur textabrotum Tveggja dónalegra hausta; " bíum bíum bambaló..je beibí", " það eru ekki fötin sem þeir vilja heldur það sem þau hylja"...
Á meðan ég hlýddi á efnisskrá drengjanna í Ekkert kjaftæði, tókst mér reyndar að gleyma því sem undan gekk...í smástund. Þetta var almennilegt pönk, textar sem fjölluðu um eitthvað og ekkert helv..kjaftæði. Frábært band og bassaleikarinn Grímur Atlason fór hamförum og úr að ofan.

Frægikallfyrradags: Aðalsteinn Ásberg Sigurðsson formaður rithöfundasambandsins en við ræddum verðlagningu á bókum í þaula. Þið munið kannski eftir honum á plötunni Berrössuð á tánum.
Frægikallgærdagsins: Ármann og Sverrir Jakobssynir, tvíburarnir eiturhressu sem voru að sjálfsögðu mættir á pönkið og rétt náðu að hemja sig og sýna stillingu meðan hljómsveitin Ekkert kjaftæði sungu; " ríkisstjórnin er polyesterdrulla og Davíð er polyestermella"

12:16 e.h. Ekki vera feiminn

 
This page is powered by Blogger.