This is where you stick random tidbits of information about yourself.
Ég er Kriss og ég er Rokk.
26 janúar 2007 Cannes Strákarnir í Reykjavík ásamt höfuðpaur hljómsveitarinnar Patrick Watson labbandi á ströndinni í Cannes.
5:44 e.h. Ekki vera feiminn
18 janúar 2007 Kkkrrroooningen! Við fórum í góða ferð til Groningen um síðustu helgi. Spiluðum á föstudagskvöldinu á hátíðinni Eurosonic, eins og hljómsveit Péturs Ben. Það eru mjög góðir krakkar. Groningen er ágætlega stór bær norðan við Amsterdam, þar voru fjöldi tónleika alla helgina en það er nú skemmst frá því að segja að við sáum ekkert skemmtilegt. Nema Pétur Ben. Við gistum líka um 30 mín. frá miðbænum á hótelinu Golden Tulip (öll hótelin heita reyndar eitthvað Tulip..) og vorum mest allan tímann þar. Á trúnó.
Á laugardeginum lögðum við af stað til Amsterdam með leigubíl. Leigubílstjóri að nafni Jan tók ástfóstri við Valda og vildi allt fyrir hann gera. Þannig fór það að við vorum í stöðugu sambandi við Jan og hann keyrði okkur fram og til baka í Groningen og svo alla leið niður í miðbæ Amsterdam. Það var 2 klst. akstur. Amsterdam er víst 2 klst. frá öllum öðrum stöðum í Hollandi. Hinn títtnefndi Jan virtist góður kall, bangsalegur og hress. En það runnu á okkur tvær grímur á leiðinni þegar hann sagði okkur frá msn-inu sínu (sem var jan....85@msn.com) eitthvað pervertískt, svo fór hann tala illa um blökkumenn og klikkti út með nettri hommafóbíusögu. Ég var voða feginn þegar við vinkuðum honum hjá útimarkaðnum í Amsterdam og löbbuðum af stað til Hrundar.
Hrund þessi er vinkona Bóasar og Ingu, er í listaháskóla þar í borg. Hún býr með bandarískum kærasta sínum og fleirum í hálfgerðri kommúnu, m.a. býr þar líka íslensk stelpa sem heitir Hrafnhildur og var að vinna í Eymundsson. Þau voru voða næs og hýstu okkur þessa nótt. Myndin hér að ofan er tekin fyrir utan húsið þeirra. Stiginn sem má sjá er sá fyrsti af 5-6 álíka þröngum stigum sem við þurftum að klífa, ekki bara með fullt fang af hljóðfærum heldur líka búslóð Valda sem er nú fluttur með Ernu til Brusluborgar. Það var þvílík Everest-ganga. Þetta var annars geysilega skemmtileg ferð í heild og við fengum frábærar viðtökur á tónleikunum. Við erum fullir tilhlökkunar að fara í næstu ferð en þá förum við til Cannes. Ég ætla að láta hér fylgja með úrvalsljóð úr smiðju Enters. Tileinkað Valda sem hefur unun af góðri ljóðlist.
Brusluborg eftir Enter (Lítil stemma úr háborg andleysisins, Brussel.) Brusluborg í Belgalandi líflaus torg og lykt af hlandi glerjabrynjuð græðgishreysi tærð af tilbreytingaleysi lepja sorg úr litlum flöskum fela sig í ferðatöskum brotnir menn með brusluglampí augum, kísilaldarkrampí taugum - hnýta bindishnútinn fitla ögn við flöskustútinn hneppa einni, tveimur tölum og æða fram af efstu svölum
má ég þá heldur heimta Gjögur nú eða Fálkagötu fjögur
Á leiðinni út hitti ég Ágúst Borgþórá BSÍ en hann var á leiðinni til Heidelberg í Þýskalandi. Ég talaði nú lítið við hann en þegar við komum á Leifsstöð og fengum töskurnar úr rútunni munaði litlu að hann hafi óvart tekið sneriltrommuna mína, og ég þá ritvélina hans. Þetta litla atriði er eins og góð flétta í smásögu hugsaði ég á leið út í vél. Ég læt hann um að útfæra þessa hugmynd...
7:45 e.h. Ekki vera feiminn
10 janúar 2007 Reykjavík! í útrás! Við erum að fara út til Hollands í fyrramálið. Spilum á Eurosonic hátíðinni í Groningen ásamt Pétri Ben, Peter Björn og John og einhverjum fleirum. Þessi Eurosonic hátíð er víst útvarpsstöðvahátíð, þar verða allir ÓlarPallar í Evrópu að ákveða playlistana sína fyrir árið. Þetta verður án efa voðalega gaman. Meðfygjandi mynd er af hljómsveitinni Reykjavík! og sá sem getur sagt hver á hvaða skó hlýtur að launum minjagrip sem ég mun kaupa í Amsterdam. (Steini, ég veit hvað þú ert að hugsa en ég er meira að spá í klossum eða túlípönum...)
3:16 e.h. Ekki vera feiminn
07 janúar 2007 Ristað brauð!
Hver kannast ekki við það þegar maður fær sér hinu klassísku máltíð, ristaða brauðsneið með smjöri, marmelaði og osti að marmelaðiskeiðin verður útötuð í bráðnuðu smjöri? Þetta er alþekkt vandamál og hafa menn verið býsnast út í smjörklessurnar oní marmelaðikrukkunni en ekki verið að einblína á lausnina á þessu hvimleiða vandamáli.
Í stað þess að að smyrja brauðsneiðina með smjöri og setja svo marmelaðið oná (og þarna er komið að kaflanum þar sem skeiðin útbíast) þá er lausnin komin í ostsneiðunum. Einfaldlega smyrjið marmelaðinu á sneiðarnar og leggið þær snyrtilega oná smurðu brauðsneiðina (sjá meðfylgjandi skýringarmynd). Ekki á ég að þurfa að minnast á það en geri það samt að vitaskuld á marmelaðið á ostsneiðinni að snúa niður. Ef marmelaðið snýr upp er hætta á að marmelaðið klístrist á vörunum og t.d. í yfirvaraskeggi sem getur verið mjög hvimleitt. Með þessu er máltíðin hin gleðilegasta og án smjörklessna og hverskonar marmelaðiklísturs.
Þetta húsráð er alveg ókeypis og í boði ritstjórnar Krissrokk, verði ykkur að góðu!
05 janúar 2007 Þetta er búið! Jólin voru yndisleg og áramótin líka. Það var gott að vera fyrir vestan...einum of gott. Við vorum í Kjarrholtinu á aðfangadagskvöldi og í Hnífsdal hjá Kaju systur á gamlárskveldi. Það var stórkostleg nostalgía að vera á Heiðarbrautinni í Hnífsdal og það beint á móti húsinu sem við fjölskyldan bjuggum í. Síðan var haldið á Suðureyri og spilað á balli. Spiluðum til rúmlega kl. 05.00. Það var mjög fyndið að spila á balli eftir eina stutta æfingu þar sem við renndum yfir 6 lagahelminga og gerðum ekkert prógramm. Við stóðum okkur samt mjög vel með Kalla Hallgríms í fararbroddi og fannst mér útsetningin af "Hún er svo sæt" standa uppúr, með dynjandi bassarödd Kalla og óaðfinnnanlegum bakröddum Venna og Rúnars. Núna er þetta allt búið, jólin og öll lætin sem Kristinn talaði um "útaf einni langri helgi" og við tekur líkamsrækt, hollara fæði, light bjór, lights sígarettur og annað leiðinlegt. Menn og dýr eiga erfitt með að leyna depurð sinni eins og sést á meðfylgjandi mynd. En ég verð að segja að það er til margs að hlakka til og vormánuðir eru alltaf æði fljótir að líða. Þá birtir til.
12:07 e.h. Ekki vera feiminn
