This is where you stick random tidbits of information about yourself.
Ég er Kriss og ég er Rokk.
28 mars 2004 Flashback! ..ég er staddur í þriggja dyra húðlitaðri Mözdu 323, sit afturí ásamt Gumma. URI situr við stýrið, enda eini sem kominn er með bílpróf, Þór situr við hliðina á honum. Við erum nýkomnir af Frábæ, þar sem URI fékk sér pítu með K. (þ.e. kjúkling), afgreiðslumaðurinn á Frábæ skrifar alltaf á pöntunina "Píta með K.", eins og URI er farinn að kannast heldur betur við og hafði þessvegna, í sínu einstaka skopskyni, tekið með sér stafinn "K" úr Scrabble og troðið inní pítuna. Okkur hinum brá örlítið þegar URI hóstaði uppúr sér K-inu með harmkvælum og öskraði á afgreiðslumanninn, "..þjónn, það er K í pítunni minni!". Við erum á rúntinum, snúum á höfninni og aftur á sjúkrahúsplaninu, URI ropar og sönglar; "Óje, óje, night of cheese, hey Gummi og Kristján! Finnið fyrir mig Gumsið, það er gul plata, hún á að vera þarna afturí glugga". "Við bara finnum hana ekki, æji getur verið að hún sé týnd" segjum við Gummi í kór.
Við fórum í heimsókn til De Vidos í dag og Siggi gaf mér afrit af nokkrum plötum, þ.á.m Gumsinu og hinni stórkostlegu Faith no more plötu Angel dust. Nú sit ég fyrir framan skjáinn, með músíkina í botni, og minningarnar hrannast upp (oooh, græni subaruinn). Ég gæti skrifað í alla nótt...
Helvíti fín helgi annars! Fórum með þeim Lambastaðabræðrum uppí Borgarfjörð á aðfaranótt laugardags, nema að Bjartur fór í heimsókn til frænku á meðan. Frábært að komast úr bænum og í annan takt. Snakk, nammi og hressandi drykkir utan í borðköntum en á borðinu, útflatt landnemaspilið "Cataan" (borið fram að hætti Jóns), teningunum er kastað og maður vinnur ellefu kindur, tvo leira, einn rekavið og ryðfrítt stál. Bissnissinn hefst, kaupa, selja. Maður finnur sjálfan sig, og spyr um leið spurninga sem reyna á sambandið. Þessi ferð okkar var dálítið eins og námskeiðið í "..and Björk of course", ef einhver var að horfa á það.
Við erum búin að vera bíllaus um helgina, der Volswagen hefur verið í viðgerð hjá Halla í Hafnarfirði, það varð víst meira að en búist var við. Ekki veit ég hvernig okkur hefur tekist að fara svona illa með hann, hann var víst alveg útkeyrður þegar hann var lagður inn. Finnst ykkur skammarlegt að vita ekki mikið um bíla? Ég verð að játa það að ég er ekki alla daga með nefið oní húddinu, tékkandi á kertastjökunum, mæla hvað er heitt á olíukönnunni og kanna hvort lyftureimin sé nógu strekkt..! Ég er bara að fást við annað! Ég ætti ekki að vera að rausa þetta, tengdó verður ekki ánægður með þetta! Annars grunar mig að sonur minn fari brátt að tala um hásingar og spindilkúlur, svo mikill er bílaáhuginn. Það læra börnin sem fyrir þeim er haft..?
21 mars 2004 (Hér á að vera einhver voða sniðug fyrirsögn) Komið þið sæl, helgin er flogin og það án slysa..að minni hálfu. Ég mætti galvaskur í vinnu á laugardag þrátt fyrir þokkalega þynnku, eftir að hafa verið á John Daniels kvöldi í Gauki á stöng. Það gekk ágætlega í vinnunni, mikið um viðskiptavini í fermingargjafainnkaupum og góða gesti m.a. þau Huldu og Hilmar sem komu í atferliskönnun uppá Súfista. Flestir ættu nú að vita að stórmerkilegur hópur, sem kallaður er Gáfumannafélagið, hreiðrar um sig á kaffihúsinu strax uppúr kl.10.00 á laugardagsmorgnum. Þar eru m.a. Jónsteinn fyrrum bóksali, Sverir Hermannsson fyrrum bankastjóri, Páll Bergþórsson fyrrum veðurfréttamaður og fleira fyrrum fólk. En núna virðist það vera þannig að hópurinn hefur tvístrast í sundur og seinna holl mætir um kl.12.30, þar eru Vigdís Finnbogadóttir fyrrum sómi, sverð og skjöldur, Guðný Ýr ekkja Sigfúsar Daðasonar, Árni og Lena Bergmann fyrrum rússar og að sjálfsögðu Anna okkar Einars sem hefur m.a. fengið Fálkaorðuna (leiðinlegt að handhafar orðunnar skuli aldrei ganga með hana um hálsinn, ég myndi gera það að lögum)! Þetta folk sem er hér upptalið er fólk með puttana á púlsinum, og verður gaman að heyra frá rannsóknum þeirra Huldu og Hilmars næstu laugardagsmorgna.
Ég horfði að sjálfsögðu mikið á sjónvarp um helgina, tók laugardagsþristinn sem klikkar ekki; Gísli Marteinn, Spaugstofan og Popppunktur. Ótrúlega skrýtinn þátturinn hjá Gísla, ægileg uppgerð. Gunnar stóð sig vel. Merkilegur þessi misskilningur hjá fólki að halda því fram að Gunnar sé lélegur söngvari, hann er alls ekki lélegur söngvari það er bara röddin sem ekki er silkimjuk. Sjálfur líkti hann rödd sinni við taugaveiklaða kind með hálsbólgu eða eitthvað... hann er svo sem enginn Robertino, en hann kann að syngja. Vá, hvað Jónsi er flaaaaaming gay (ég má taka svona til orða, því ég er útskrifaður úr gay-fræðum og hef réttindi)! Fyndið annars hvað hann kallast á við Birgittu Haukdal, hann er nú í vinsælasta poppfroðubandinu, auglýsir súkkulaði, er á leiðinni í Eurovision, hann á bara eftir að skilja við konuna og byrja með trommuleikaranum.
Popppunktur með Skuff og Bje var ágætur, allavega fram að því þegar Felix byrjaði á "áfram KR" veilunni. Hvað er þetta með helv.. KR-inga, þurfa þeir að æpa upp um allt? Enginn annar þjóðflokkur gerir þetta. Ég man eftir ferðum mínum með Geirfuglum þegar Freysi var sífellt að æla þessu út úr sér, jafnvel þó við værum að spila í brúðkaupi á Stykkishólmi! "Kæru brúðhjón, til hamingju með daginn og áfram KR". Þetta er bara heilaþvottur af verstu gerð! KR og Sjálfstæðisflokkurinn! Geðveila.
Spaugstofan var viðbjóður, helv..geirfuglinn þarna sem var pönslænið í öllum bröndurunum, ojjbara. Besta íslenska grínið í dag er tvímælalaust Dóri Gylfa með ævintýrin í Stundinni okkar. Og svo er Baggalútur fínn...
Hljómsveit Dr.Gunna er á leiðinni á Ísafjörð um páskana. Grímur Atlason, hinn týndi sonur Súðavíkur, ætlar með fjölskyldu sína vestur á firði og okkur vantar fyrir þau mannabústað yfir páskana. Ef ykkur dettur eitthvað í hug, kæru lesendur, látið mig vita..!
11:22 e.h. Ekki vera feiminn
18 mars 2004
Það er fátt um fína drætti hér þessa dagana. Það er búið að vera mikið að gera, fór annars á mjög skemmtilega árshátíð á laugardaginn þar sem m.a. hljómsveitin Hraun! skemmti. Hún var skemmtileg.
Stefán er kominn heim úr uppherðslunni fyrir vestan, það var mjög gaman að sjá hann aftur frá því á laugardeginum. Ég er í vinnunni núna svo það er ljóst að ég skrifa ekki meira í þetta skiptið.
10 mars 2004
Þetta er ekki góður dagur. Menn haga sér einkennilega. Mér skilst að skýringin sé sú að það er lágþrýstingur. Vonandi kemur nýr dagur...
1:23 e.h. Ekki vera feiminn
09 mars 2004
Við Bryndís erum að fara á árshátíðir nú um komandi helgi og höfum við ákveðið að senda Stefán Bjart í sveit á meðan. Það þarf að herða hann upp. Ef þið vitið um einhvern sem er að fara vestur á Ísafjörð á föstudaginn með flugi, látið vita..!
8:50 f.h. Ekki vera feiminn
07 mars 2004 K&B, MSC og PPPP Í gær var opnunarhátíð Klink og Bank, þar var mikið um dýrðir! Fór ásamt stelpunum í Homebreakers á opnunarfest um kvöldið þar sem allir aðstandendur borðuðu saman og dönsuðu, maturinn var stórgóður, barinn helvíti fínn og ódýr og varð þetta hin besta skemmtan. Reyndar skildi ég engan veginn skemmtiatriði gjörningaklúbbsins og ragnars kjartanssonar, þar sem þær voru í hempum og sulluðu í freyðivíni og á meðan baulaði ragnar allsber, en þetta eru náttúrulega myndlistarmenn og ég hef sjálfur ekki þann þroska né skilning sem þarf til að túlka verkið. Það er á svona dögum sem ég er feginn að vera ekki myndlistarmaður..
Áhrifameiri var gjörningurinn sem tók við eftir klink og bank, þegar þeir Lambastaðabræður dróu mig í öndergránd leðurhommaklúbb í miðbænum. Þar var engin uppgerð á ferðinni og við þetta rann hressilega af mér. Á leiðinni heim kom ég við á Ölstofunni, til að ná áttum og hitti þar Helga Björns og Brynju hans Bubba. Já, ég þekki þau.
Ég missti af Popppunkti í gær og er þetta eini þátturinn sem ég hef misst af. Þetta verður jafnframt eini þátturinn sem ég missi af af ásettu ráði en ég get ekki fyrirgefið þeim PPPP mönnum að fá Atómstöðina í þáttinn. Svo væri það náttúrulega eftir öllu að þeir hafi unnið og komi aftur, ég vil ekki vita það...
11:16 e.h. Ekki vera feiminn
03 mars 2004 Muuuuu..! Jú, komið þið sæl! Ég sit hér heima og get ekki annað. Uppskar hálsbólgu og kvefpest úr tónleikaferð okkar í norðurlandskjördæmi eystra. Reyndar held ég að ég sé að erfa þetta frá honum Guðmundi, sem hafði verið ansi langt leiddur í hálsbólgunni á tímabili. Ég man eftir því á leiðinni upp Öxnadalsheiði að Guðmundur stökk út og smalaði nokkrum hrossum af þjóðveginum innum girðinguna og á meðan þá hélt ég á bjórnum hans, auk þess að halda á mínum. Síðan hef ég náð að rugla þeim saman. Er kynvilla smitandi..? Nei, djók!
Annars var virkilega gaman að fara norður, áttum fína spilamennsku á Akureyri og Húsavík en mætingin hefði getað orðið meiri. Mikið af unglingum í Sjallanum, þar sem við spiluðum með Skyttunum og Hvanndalsbræðrum, en á Húsavík var meira okkar crowd ef svo mætti segja. Hittum bassafautann úr Mínus, hann var ansi hress í Sjallanum, náttúrulega löngu hættur í dópinu eins og hann sagði alþjóð í þættinum hjá Jóni Ársæli á dögunum. Fanturinn náði víst að gelta út fimm bjóra á barnum og skrifa þá á okkur í bandinu. Það kom okkur ekki við. Skemmtilegast var að hitta hinn mikla meistara; Rögnvald gáfaða en hann er með fyndnari mönnum. Kíktum í kaffi til hans og í Pínkuponsulitlu plötubúðina. Með Rögnvaldi rifjuðum við upp gamla sögu af öðrum snillingi að norðan; gaur sem kallaður er Lími (hann borðaði svo mikið af hörðnuðu lími þegar hann var yngri)! Lími var fullur með strákunum á fleygiferð í Eyjafirðinum, akandi um á Chevrolet Van. Lími sá þá belju í vegkantinum og langaði að gera gott djók og rassskella beljuna. Hann bað bílstjórann um að hægja lítillega á bílnum, opnaði hann þá rúðuna og lét vaða á aftari enda beljunnar. Blessuð beljan var lítið var við það sem átti sér stað og sagði bara MUUUUUU! Lími hinsvegar þríhandleggsbrotnaði...!
Ég ætla að halda áfram að vera veikur, horfa á vídeó og svoleiðis. Gestabókinni tróð ég þarna efst á kunnuglegar slóðir, farið svo að láta í ykkur heyra, Bekks talar út í tómið. Og hlustar á Who, ekki slæmt.
